Oqaluttuarisaanermut tunngasumik qulaajaaneq aallartissinnaanngorpoq

Børne- og socialminister Mai Mercado aamma Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen, ataatsimoorlutik suliassap nassuiarneqarneranik suliaqarsimapput, taannalu oqaluttuarisaanermut tunngasunik atituumik qulaajaanissamut sinaakkusiivoq.

- Oqaluttuarisaaneq tunngavigalugu isiginniffiit, aalajangiisoqarnissaanut ingerlatsisimaneq, meeqqat inuunerminni atugarisaat aamma inunnut ataasiakkaanut tamaaliortoqarnerata kingunerisaasa misissorneqarnissaat qallunaat kalaallillu tungaannit qilanaarineqarpoq, Namminersorlutik Oqartussanit tusagassiuutinut nalunaarummi tamanna allaqqavoq.

Siunissami qaninnermi qallunaat naalakkersuisui aamma Namminersorlutik Oqartussat suliamik ilisimasaqartut marluk pingasulluunniit qulaajaasussatut toqqassavaat.

Uku qulaajarneqassapput:

Suliniutip oqaluttuarisaanermut atassuteqarnerata oqaluttuassartaa.

Oqartussat, suliffeqarfiit suliniaqatigiiffiillu pisumut peqataasimasut eqqarsaasersuutigisimasaat, aalajangiiffigisimasaat iliuuserisimasaallu makkununnga tunngassuteqartut:

• aalajangiiniarnermi iliuuserisimasat suliniummik aallartitsinermik kinguneqartut
• meeqqanik aallartinneqartussanik toqqaaniarnermi, matumani meeqqat qanigisaannik oqaloqateqartarsimanerit ilanngullugit
• meeqqat pineqartut 1951-52-imi Danmarkimiinneranni
• meeqqat pineqartut kingusinnerusukkut inersimasunngornissartik tikillugu Nuummi
• børnehjemmimut inissinneqarsimanerinut pingaaruteqartut
• meeqqanut pineqartunut meeravissianngortinneqarsimasunut suliniutip naammassineqarneranut atatillugu iliuuserineqarsimasut, matumani iliuuserineqarsimasup sooq nangeqqinneqarsimannginnera ilanngullugu

Meeqqat Danmarkimiinnerannik kingusinnerusukkullu Kalaallit Nunaanniinnerannik qulaajaaneq, matunnga ilanngullugit:

• Danmarkimi inuunermi atukkat
• Nuummi børnehjemmimi pilersinneqaqqammersumi inuunermi atukkat
• Qallunaat kalaallillu inuiaqatigiit meeqqanut pineqartunut isiginneriaasiat.

Meeqqat pineqartut misigisimasaat kinguneqartitsinerallu, matumani pineqartut suli inuusut

• apersorneqarsimanerat ilanngullugu.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen ima oqaaseqarpoq:

- Oqaluttuarisaanermi pisimasut taamatut ittut nassuiarneqarnissaat pingaaruteqarpoq. Pereersut allanngortissinnaanngilagut, kisiannili meeqqat pineqartut, taakkulu ilaqutaat nalinginnaasumillu inuiaqatigiit eqqarsaatigalugit, taava suliami pisimasut assigiinngitsut paasissallugit pingaaruteqarpoq, taamaalilluta qanoq pisoqarpiarsimanersoq paasiniassagatsigu. Suliap naggaserneqarnissaa qilanaaraara. Meeqqat pineqartut inuiaallu kalaallit pillugit taamaaliortariaqarpugut.

Børne- og socialminister Mai Mercado ima oqaaseqarpoq:

- Meeqqat ilaqutaasullu atorsimasaat tusaallugit misigisaavoq sakkortooq. Naak siunertarineqartut pitsaagaluartut, taamaattoq ingerlatsisimaneq meeqqanut amerlasuunut annertuumik ajortumik kinguneqarsimammat qularutissaanngilaq. Ullumikkut qanga pisimasut paasissaanngitsutut ipput. Kisianni qanorluunniit kissaatigitigigaluarukku allanngortissinnaanngilakka. Taamanikkut aalajangiinerit sunik tunngaveqarsimanersut paasinarsisinneqartussanngormata nuannaarutigaara. Kina pisuusimanersoq uani pineqanngilaq, kisiannili tamattaalluta oqaluttuarisaaneq ataatsimoorussarput pillugu ilisimasaqarnerulernissarput pineqarpoq, taamaalilluta ataatsimoorluta qanga pisimasut isigisinnaalerniassagatsigit. Inunnut suliami uani kalluarneqarsimasunut tamanna aamma pingaaruteqassasoq isumaqarpunga.

Suliassat nassuiarneqarnerat uani atuakkit