angallassineq
Kiffartuussinermut isumaqatigiissutit Wæverip kamaatigigai: Mattusersuilluni aaqqiinerit akisuut
Borgmesterip Jørgen Wæver Johansenip (S) Naalakkersuisunut ammasumik allagaqarnermini kiffartuussinermut isumaqatigiissutit ilassuserlugit isumaqatigiissutinut pakatsinini oqaatigaa
Naak allataq allakkatut saqqummiunneqaraluartoq, nassiussisup allannermi pakatseqqanera malugilluarneqarsinnaavoq.
Kiffartuussinermut isumaqatigiissutit isumaqatigiissutigineqarsimasut Naalakkersuisut atortiinnarniarlugit aalajangersimanerat, ilassutinillu isumaqatigiissuteqarnikkut pitsanngoriartissimammatigit, Kommune Kujallermi borgmesterip Jørgen Wæver Johansenip (S) kamaatigaa.
Atuaruk: Kiffartuussinermut isumaqatigiissutit siornarnit akisunerulertut
- Kommune Kujalleq sinnerlugu ajuusaarutigalugu nassuerutigisariaqalerpara, kiffartuussinissamik isumaqatigiissut isornartorsiorneqaqisoq atorunnaarsinnagu Naalakkersuisut mattusersuillutik aaqqiissuteqassallutik allanngortinneqarsinnaanngitsumik aalajangersimasut, Naalakkersuisunut ammasumik allagaqarnermini allappoq.
Atuaruk: Kiffartuussinermut isumaqatigiissummut 22 millionit saniatigut aningaasaliissutaasut
Aaqqiissut akisooq
Borgmesterip isaanit mattusersuilluni aaqqiinerinnaanera pineqanngilaq, tamanna akisoorsuunerarpaa. Kiffartuussinermut isumaqatigiissutit atuuffianni isumaqatigiissutigineqarsimasunut sanilliullugu aningaasartuutit saniatigut 87 millionit koruuninik akiliisoqassaaq.
Atuaruk: Kiffartuussinermut isumaqatigiissutini pitsanngoriaatit sisamat
- Piffissap imaalinerani paasivarput, Naalakkersuisunut ilaasortaasimasup siunnersorneqanerlunnermini kingunissaasut paasisimanngikkai paaserusussimanngikkaalu, taamaalillunilu pisinnaatitsissut attanneqarsinnaanngitsoq Aningaasaqarnermut Ataatsimiititaliap tunniussimasaa najoqqutaralugu, aammalu kukkullutik sinaakkusiussarineqarsimasunik najumminninniaannarsimanerisigut, ullumikkut aningaasaliissutit qaavisigut immikkut 87 millionit koruuninik inuiaqatigiit akiliisitaasussanngorput, Jørgen Wæver Johansenip oqariartuutini naqissuserlugu pingasunik torluuserlugu allappoq.
Atuaruk: Kiffartuussinissamut isumaqatigiissutit nutaat pillugit akerliussutsimik takutitsineq
Angallassineq isumannaallisaanikkut aammalu sillimaniarnikkut sutigut tamatigut piareersimaffiunissaa, Naalakkersuisunit qulakkeerneqarnissaa kajumissaarutigaa.
Allaaserisap talerpiata tungaani linki atorlugu borgmesterip ammasumik allagaa atuarsinnaavat