Angallanneq

Kiffartuussinermut isumaqatigiissutini pitsanngoriaatit sisamat

Ilaasut kinguaattoortillutik nerisaqarlutillu unnuinermut ilaatigut akiliutsittassapput

Namminersorlutik Oqartussat ilaatigut Kujataani qulimiguulimmik angallassinermut aningaasaliissutitik amerlivaat

Ukiuunerani qulimiguulimmik saniatigut angallassineq, kinguaattoortoqartillugu ilaasunut ajorseriartitsinnginneq, Qeqertarsuup Tunuani qulimiguulimmut bilitsit akikinnerit, kiisalu sullitanut annertuunut soorlu assersuutigalugu peqqinnissaqarfimmut bilitsisinissamut periarfissat pitsaanerusut.

22,2 millionit koruunit
Naalakkersuisoqatigiit Siumut, IA aamma Partii Naleraq immikkut ittumik 22,2 millionit koruuninik aningaasaliissuteqarnermikkut angallannermut kiffartuussinermut isumaqatigiissutit akerleriissutaasut pitsanngorsarpaat - taamaalillutillu ilaatigut borgmesterit Siumumeersut isornartorsiuinerannut tusaasimallutik iliuuseqarput.

Pitsannguinerit ataasinngornermi Kommuninut, Nunaqarfinnut, Isorliunerusunut, Attaveqarnermut Ineqarnermullu naalakkersuisumit, Martha Lund Olsenimit saqqummiunneqarput.

Angallannerup ilusaata nutaap annerpaartaa ukiumi nutaami suli atuutilissasoq naalakkersuisoqatigiit naqissuserpaat, tassani umiarsuaateqarfik Disko Line aamma Air Greenland kiffartuussinermut isumaqatigiissuteqarfiusuni angallassissapput, kisianni arlalitsigut aaqqiisoqassamaarpoq.

Atuaruk: Ilaasut timmisartorlutillu umiarsuartassapput

Pitsanngoriaatit
Pitsanngoriaatit nunaqavissunut siunnerfeqarput - takornarianullu siunnerfeqaratik.

  • Kinguaattoortilluni ilaasut nerisaqarnermut unnuinermullu akiliisussaajunnaarput, taamaattoqartillugulu bilitsitik annaaratarsinnaajunnaarpaat. Taava assersuutigalugu Disko Linep angallataa, Air Greenlandip aallannginnerani tikinngitsuussappat, 9 millionit koruuninik aningaasaliissutip ilaasut annaasaqannginnissaat qulakkiissavaat.
  • Kujataani qulimiguulinnik angallassinermut aningaasanik amerlanerusunik immikkoortitsisoqarpoq, taamaalilluni Bell 212-it marluk katillugu pingasunik inuttallit decembarimit marsip tungaanut atorneqartassallutik. Nanortalimmut qulimiguulimmik attaveqaat pitsanngoriassaaq, taamaatullu Qaqortup Narsarsuullu akornanni bilitsit akikillissallutik.
  • Qeqertarsuup Tunuani qulimiguulimmik timmisartuussineq qaammammik ataatsimik sivitsorneqassaaq, taamatullu qulimiguulinnut bilitsit, mittarfinnut akileraarutit ilanngunnagit 30 procentimik akikillissallutik.

Atuaruk: Angallannermut tunngatillugu ajorseriarnerit peerneqartut

Qulimiguulimmik saniatigut ilanngussineq 9,1 millionit koruuninik akeqarpoq, bilitsit akikinnerusut 3,6 millionit koruuninik akeqarlutik, sullitanut angisuunut aaqqiissut 0,5 millionit koruuninik akeqassaaq, Namminersorlutik Oqartussat ilisimatitsipput.

Kiffartuussinermut isumaqatigiissutit ilaasunik angallassinermik, isorliunerusunut suliat niuernermut tunngaveqartumik aaqqiiffigineqarsinnaanngitsunut nassiussanik aamma allakkanik qulakkeerinnissapput.

Assit takukkit: Qaqortumi akerliussutsimik takutitsisut aatsaat taama amerlatigisut

Powered by Labrador CMS