Kelly Berthelsen: Anngajaarniutinik atornerluineq akiorniarlugu, isumaginninnikkullu iluarsaaqqittariaqarpugut

Kujataani hash naamaartarnerlu ajornartorsiutaapput, tamatumani meeqqat arfineq-marlunnik ukiullit allaat naamaartartut meeqqallu qulinik ukiullit angajoqqaaminnik hashimik pujortaqateqartarlutik.

MIO Kommune Kujallermi angalanermini nalunaarusiaani atuarneqarsinnaavoq.

Aanngajaarniutinik atornerluineq akiorniarlugu, isumaginninnikkullu iluarsaaqqittariaqarpugut, Inatsisartuni ilaasortaq, Kelly Berthelsen (IA), isumaqarpoq.

Atuaruk: Meeqqat angajoqqatik hashimik pujortaqatigisaraat

Tarnikkut ajornartorsiutit

1981-mi Isumaginninnermik iluarsartuusseqqinnissamut kommissionip isumaliutissiissutaa saqqummerpoq nassuerutigineqarmat isumaginninnermi malittarisassat inuiaqatigiit ineriartornerannut naleqqukkunnaarsimasut.

- Taamani pingaartumik aningaasatigut atugassarititaasut - soorlu ineqarnermut aningaasartuutit - malittarisassatigut oqilisaavigineqarnissaat isumalioqatigiissitat suliassaani pingaaruteqarsimapput.

Maannalu isumaginnittoqarfinni sulisussaaleqinerujussuaq piulluni, Kelly Berthelsen oqarpoq.

- Taamaammat, ajornartorsiutit allanngorsimanerat - aningaasanuinnaq tunngajunnaarlutik - tarnikkulli atukkanut tunngalerlutik allanngorsimanerat taamalu oqimaannerulersimanerat aammalu sulisussaqarniarnerup inorsarfiulersimanera pissutigalugu isumaginninneq tamarmi naqqaniit allanngortitertariaqalerpoq - isumaginninnikkut iluarsaaqqinnissamut piffissanngorpoq, Kelly Berthelsen oqarpoq.

Atuaruk: Meeqqat illersuisuata Kujataani meeqqat atugaat ernummatigai

Imigassaq ajornartorsiutaaneruvoq

Imigassaq ikiaroornartorlu ukiorpassuanngortuni akiorniarneqartuartut, Kelly Berthelsen isumaqarpoq.

- Atornerluinerup kinguneri amerlaqaat, pingaartumilli isumagininnikkut suliassat imigassamik pissuteqartaqaat. Suliffeerunneq, inissaarunneq atornerluinermik aallaaveqartaqaat. Ajornerpaavorli meerarparujussuit eqqugaasarmata. Sumiginnagaaneq, kaanneq, kinguaassiutitigut atornerlugaaneq.

Taamaammat iluarsaaqqittoqarnissaa pisariaqarlersimavoq, atornerluinerujussuaq immikkut iliuuseqarfigineqartariaqalerpoq, angajoqqaat pisussaaffimmik tigusisinnaanngortariaqalerput, politikerillu isumaginnittoqarfiit suliassanik tigusisinnaanngornissaat anguniartariaqalerluni.

Aanngajaarniutinik atuinerup inuiattut sungiunnissaa utaqqiinnarsinnaajunnaarparput, utaqqiinnarutta nunatut nakkaattoornissarput qanilliartuinnassaaq. Sutigut tamatigut akiuineq aallartittariaqalerpoq. Aqutsinikkut akiuineq erseqqissoq takutinneqartariaqalerpoq - soorlu pinaveersaartitsinermut naalakkersuisoqarfimmik pilersitsineq allallu iliuutsit timitallit aqqutigisariaqalerput, Kelly Berthelsen oqarpoq.

Atuaruk: Meeqqat pillugit nalunaarusiap nikallunganartup borgmesteri iliuuseqartippaa