Kommune Kujalleq

Meeqqat pillugit nalunaarusiap nikallunganartup borgmesteri iliuuseqartippaa

Meeqqat illersuisuat Kommune Kujallermi atukkat pillugit nikallunganartumik nalunaarusiamik saqqummiusseqqammerpoq. Borgmesterip Jørgen Wæver Johansenip nalunaarusiap inassuteqaataat nuannaarutigai meeqqallu pillugit isumasioqatigiissitsinissamut qinnuiginnippoq

Meeqqat illersuisuata nalunaarusiaa nutaaq pingaartillugu tiguaa, kommunilu meeqqat pillugit isumasioqatigiitsitsisariaqartoq isumaqarpoq, tassani siunissami periusissaq aalajangerneqassalluni

Meeqqat illersuisuat ullumi pingasunngornermi Kommune Kujallermi atukkat pillugit nalunaarusiamik saqqummiussivoq, meeqqat atugarissaanerannut, ineriartornerannut Naalagaaffiit Peqatigiit Meeqqat Pisinnaatitaaffii pillugit Isumaqatigiissutaaniittut tunngatillugu ernummatigineqartunik.

Aamma atuaruk: Meeqqat illersuisuata Kujataani meeqqat atugaat ernummatigai

Meeqqat illersuisuata nalunaarusiaq pingasunngornermi kommunimi tusagassiortunik katersortitsinermi saqqummiuppaa, tamatumalu borgmesteri ingerlaannaq iliuuseqartippaa.

- Ukiuni amerlavaallaani ajornartorsiutit ersiutaat kisiisa iluarsiniartarsimavavut, ajornartorsiutilli pingaarnersaat, tassa angajoqqaat ilaasa angajoqqaatut pisussaaffimminnik naammassinnittannginnerat meeqqanminnullu saaffissatut inissisimasannginnerat, sumiginnarsimavallaarparput - aamma maligassiuisuugaluaruttaluunniit. Taamaammat suut tamaasa ataatsimut isigalugit suliniartariaqalerpugut, ajornartorsiutip ersiutai pinnagit ajornartorsiutillli aallaavippiaat sammilertariaqarlugit. Ullormiit ullormut tamakku aaqqinneqarsinnaanngillat, ajornartorsiutilli nassuerutigineqarnera aaqqiiniarnermi aallarniutissaavoq taamalu meerartatta siunissaannut pitsaanerusumut toqqammavissamik pilersitsissalluta, Jørgen Wæver Johansen tusagassiuutinut nalunaarummi allappoq.

Meeqqat pillugit isumasioqatigiisitsiniartoq
Apriilip sisamaanni qinersinerup kingorna kommunalbestyrelsit nutaat meeqqat pillugit isumasioqatigiinnissaannut qinnuiginiarlugit ilisimatitsivoq, tassani nalunaarusiami kaammarttuutigineqartut misissorneqassallutik. Aammattaaq MIO-mik allanillu peqatigiiffinnik attuumassuteqartunik suleqateqarneq aallartissarnissaannut suliniuteqarniarpoq.

- Meeraq qitiutissavarput eqqaamallugulu meeqqat siunissarigatsigit. Tassa siunissaq ataatsimoorluta kisitta pilersissinnaasarput, Jørgen Wæver Johansen oqarpoq.

Powered by Labrador CMS