Kalaallisut ilinniartitaanissamut aqqut takisoq

Naalakkersuisoqatigiit anguniagaat ersarippoq: 'Kalaallisuinnaq oqaasillit ilinniarnissaminnut periarfissaat annertusarneqassapput'.

Tamannali ilinniarfinni piviusunngortinneqarnissaanut naalakkersuisoqatigiinnissamut isumaqatigiissummi allannissaa ajornannginnerusoq, Nivi Olsenip §37 naapertorlugu apeqquteqaataanut akissutip takutippaa.

Ilinniarfiit arlaqartut kalaallisut ilinninniarneq aamma atuakkat ilinniartitsissutit kalaallisuunngortereerpaat, ilinniartitaanermut naalakkersuisoq Doris Jakobsen (S) akissuteqarnermini nassiaavoq.

Atuaruk: Inuusuttut amerlanerusut ilinniarsimanatillu suliffeqanngillat

Tunngaviusumik kisimi kalaallisut ilinniarneq
Tamannali tunngaviusumik ilinniarnerinnarmut tunngavoq, taamaammat ilinniartut kalaallisuinnaq oqaaseqartut ilinniakkamik sivisunerusumik naammassisaqarniarunik suli piareersimavallaarnavianngillat.

- Ilinniagaqartullu ataasiakkaat ilinniakkaminnik ingerlatitseqqinniaraangamik, assersuutigalugu ilinniakkami pingaarnermi, amerlasuutigut pisariaqartarpoq danskit oqaasiinik aamma / imaluunniit tuluit oqaasiinik piginnaasaqarnissaq, Doris Jakobsen (S) akissuteqarnermini allappoq.

Ilinniarfinni assersuutigalugu KTI, Perorsaanermik Ilinniarfik, Imarsiornermik Ilinniarfik Paamiut aamma Niuernermik Ilinniarfik Qaqortumi kalaallisuinnaq ilinniarsinnaalernissamut ukiorpaalussuit qaangiuppata pisinnaasoq aamma erseqqissumik allaqqavoq.

- Tamanna anguneqarsinnaavoq kalaallisut oqaasillit ilinniarluarsimasut amerlanerusut pigilerutsigit aamma oqaatsitsinnik pingaarnerutitsilernikkut, Doris Jakobsen akissutimini nangilluni allappoq.

Atuaruk: Nivi Olsen: Ilinniartitsisunngorniarneq pitsanngorsaavigineqartariaqarpoq

Ilinniaqqinneq
Ilinniartitsisut marlunnik oqaaseqartut atorfinitsinneqarnerisa saniatigut, ilinniartitsisut kandidatitut ilinniarsimanngitsut atorfinitsinneqartarnissaat periarfissaasoq, ilinniartitaanermut naalakkersuisoq isumaqarpoq.

Taakku kandidatinngortillugit ilinniarteqqinneqarsinnaapput. Tamannalu akikitsuinnaanngilaq, tassami naalakkersuisoqarfiup ilinniartitsisup ataatsip ilinniarteqqinneqarnissaa 1,3 millionit koruuninik akeqarnissaa naatsorsuutigimmagu.

Atuakkat ilinniartitsissutit
Tamannali tassunga killinngilaq.

- Unammilligassarli annerpaaq tassaassaaq ilinniartitsinerup atortussat ullutsinnut naleqquttut atorlugit ingerlanneqarnissaa, Doris Jakobsen akissuteqarnermini allappoq.

Atuakkat ilinniartitsissutit Ilinniarfissuarmi kisimi atorneqartussat nutserneqarnissaat aningaasartuutaangaatsiassapput.

- Fagillu 15-it missaanni toqqagassaanerisigut 43 mio. kr.-it missaat immikkoortittariaqassapput atortussanik nutserinernut, ullumikkut ilinniartitsisunngorniarnermi atorneqartartunut, akissummi allaqqavoq.

Piffissamilu kingusinnerusumi ilisimatusaatinik nutaanik saqqummersitsisoqarpat, nutaamik nutserisitsinissaq pisariaqalissalluni.