Jens Kristian Friis-Sallingip Polar Seafoodimi piginneqataassutsini qitornaminut tunniuppai
Miki Brønsip ataatami Anders Brønsip decembarimi 2018-imi Aalborgimi ipilluni ajunaarnerata kingorna Polar Seafoodimi piginneqataassutai tiguai. Friis-Sallingip qitornaasa angummi piginneqataassutaanik tigusinerisa kingorna Polar Seafoodimi kinguaariit nikinnerat pilersaarutaasoq maanna naammassineqarpoq.
Polar Seafoodimik pilersitsisup, piginneqataasup pisortaanerullu, Jens Kristian Friis Sallingip, suliffeqarfissuarmi milliardinik isertitaqartumi piginneqataassutsini qitornaminut tunniuppai.
Kinguaariit nikinnerata pilersaarusiorluakkap piginneqatigiiffiup nunatsinniittup, Polar Seafood Greenland A/S-ip aammalu Danmarkimi suliffeqarfiutaata Polar Seafood Denmark A/S-ip piginnittuinik pisortaqarnikkullu aaqqissuussaanera allannguiffigissavaa. Ingerlatseqatigiiffik tusagassiuutinut nalunaarummi taama ilisimatitsivoq.
Kinguaariit nikinnerisa kingorna Bent Friis-Salling aamma Miki Jonas Brøns naligiillutik Polar Seafood Greenland A/S-imi pisortanngorput.
Qullersanngortut
Taamaasillutillu nunatsinni tuniniaanermik ingerlatsiviup namminersortunit pigineqartup annersaata ulluinnarni ingerlanneqarneranut akisussaaffik marluullutik ingerlattussanngorpaat.
- Suliffeqarfiup nukittuup ineriartorfiusullu ulluinnarni aqunneqarnera Bentilu akisussaaffigilissavarput. Ineriartornerullu pitsaasup allanngornani patajaatsuujuarnissaa suliassarissavarput, Miki Jonas Brøns oqarpoq.
- Ukiuni kingullerni suleqatigiinnitsigut immitsinnut sungiulluarpugut suliffeqarfillu sukumiisumik ilisimasaqarfilerlugu, Polar Seafood Greenlandillu ilisarnaatai patajaassuseq aamma naleqassuseq tunngavigalugit ingerlatsinissatsinnut piareersimalluta misigisimavugut, pisortat marluk ataatsimut oqarput.
- Suliassatsinnut maniguulluta ataatattalu pilersitaannut ataqqinningaarluta aqutsinerup ingerlanneranik tigusissaagut. Suleqatit pikkorissorpassuit nunatsinniittut, nunami aamma immaani sulisut, suleqatigalugit suleqatigiinnissatsinnut qilanaarpugut, Bent Friis-Salling aamma Miki Jonas Brøns oqarput.
Siulersuisuniiginnassasoq
Bent Friis-Sallingip aamma Laila Friis-Sallingip Polar Seafood Greenland A/S-mi piginneqatigiissutit 50 procentii pigilerpaat, sinnerilu 50 procentit Miki Brønsip pigiinnassavai, pisortaanerujunnaartullu avataanit peqataanissaminut qilanaarpoq.
- Kinguaariit nikinnerat nuannaarutigaara, Jens Kristian Friis-Salling, maanna Polar Seafood Greenland A/S-imi pisortaanertut tunuartoq oqarpoq.
- Suliffeqarfik ingerlalluarpoq, ukinullu tulliuttunut pisussatut periusissiatta suliniutigisassatullu aalajangiussatta maannalu ingerlalluarneqalereersut, malinnaaffiginissaat qilanaaraara. Siulersuisuni ilaasortatut ilisimasakka misilittakkakkalu atorfissaqassapput, ingerlatsinermili siusinnerusukkutulli peqataassanngilanga,Jens Kristian Friis-Salling oqarpoq.