Polar Seafood marlunnik pisortamut tullersorteqalerpoq
Miki Brøns aamma Bent Salling Polar Seafood Greenland A / S-imi pisortamut tullersortitut atorfinitsinneqarput novembarip aallaqqaataani.
Polar Seafood marlunnik pisortamut tullersorteqalerpoq, tassami Miki Brøns aamma Bent Salling novembarip aallaqqaataanit tassani atuuffeqalerput.
- Atorfinitsitsinerit Polar Seafoodip siunissaq ungasissoq eqqarsaatingalungu iliuuseqartarneranut ersiutaavoq, soorlu aamma aningaasaliissutissanut pilersaarusiornermut ineriartortitsinissamullu periusissiornermut tamanna atuuttoq, Polar Seafood tusagassiutinut nalunaarummi allappoq.
Akisussaaffiit
Miki Brønsip ingerlatseqatingiiffiup pingaarnerup allaffissornermi ingerlatsinera akisussaaffingissavaa.
- Ingerlatseqatingiiffiullu nunatsinni pinginneqatingiiffiutaani allaffissornermi ingerlatsineq malinnaavingissavaa. Saniatingullu pisassarititanut aqutsinermut aammalu aalisarsinnaanermut akuersissutinut tunngasut akisussaaffingissavai, nalunaarutigineqarpoq.
Toqqaannaq attaveqaat
Bent Sallingip pingaarnertut Polar Seafoodip aalisariutaasa ingerlanneqarneri akisussaaffingissavai.
- Saniatingut ingerlatsiviup nunami suliffeqarfiutaanut tunngasut isumangisarissavai. Tassa taakkunani siulersuisuni ilaasortatut aamalu tunisassiornermik ingerlatsiviit ingerlatsiviullu pingaarnerup akornanni toqqaannaq attaveqaatitut, ilisimatitsissutigineqarpoq.
Miki Brøns Anders Brønsip erneraa. Taanna 2018-imi ajunaarpoq. Bent Sallingip Polar Seafoodimi pisortaq Jens Salling ataataraa.