Ivaaraq pillugu suliaq: Politikkikkut suliaqartoqarnissaa Aajap piumasaraa
Inuit innarluuteqartut pillugit sullissinermi pitsanngorsangassat amerlapput. Folketingimi ilaasortaq Aaja Chemnitz taama isumaqarpoq. Ivaaraq pillugu oqaaseqaatini facebookimini taanna allaatigisaqarpoq.
Inuit innarluuteqartut angerlarsimaffianni Ivaaqqami pisoq pillugu arlaannaalluunniit akisussaaffimmik tamakkiisumik suli tigusinngilaq. Meeqqanut, Inuusuttunut Ilaqutariinnullu Naalakkersuisoq, Mimi Karlsen (IA) suliaq pillugu tusagassiorfinnut nalunaaruteqarsimavoq pisoq alianarluinnartutut taallugu Naalakkersuisullu pisoq aliasuutigigaat, suliarlu pimoorullugu tigullugu.
Tamannali naammanngitsoq, Folketingimi ilaasortaq, Aaja Chemnitz (IA) isumaqarpoq.
Taassuma tikkuarpaa politkkikkut iliuuseqartoqartariaqartoq, inuit innarluuteqartut ulloq unnuarlu angerlarsimaffimmi najugaqartut ilaqutaalu toqqissisimasinnaaqqullugit. Iliuusiusinnaasut pitsaanerusumik sullissinerusinnaapput, atugassarisanillu pitsanngorsaasuusinnaallutik.
- Isumaqarpunga inuiaqatigiiusugut nakkaattoorluinnartugut, inuit innarluutillit Danmarkimut nuutsiinnarnissaat kisimi periarfissaalersimappat. Inuit ataasiakkaat pisuunngillat, Naalakkersuisulluunniit pisuunatik, kisiannili ukiorpassuarni atugarissaassutsitta sumiginnarneqarnera pisuulluni, Aaja Chemnitz facebookimini allappoq.
Sermitsiaq.AG-mut itisiliilluni nassuiaavoq Ivaaqqami pisoq inuup ataasiinnaap pisuussutiginngikkaa.
Suliaq pillugu naatsumik
Arnaq 23-nik ukiulik annertuumik innarluuteqartoq, Qaqortumi Ivaaqqami najugaqartoq, tallimanngornermi 2. september meerartaarpoq. Erninissaa sioqqullugu naartusoq Ivaaqqami sulisunit ilaqutaasuniillu ilisimaneqarsimanngilaq. Arnaq annertuumik innarluuteqartoq oqalussinnaanngilaq pisussinnaananilu, taamaammat naartunera ernineralu kinguaassiutitigut atornerluinermit pisimassasoq ilimagineqarpoq.
Ulloq unnuarlu angerlarsimaffik politiinut tunniunneqareerpoq.
Sermitsiaq.AG-p paasissutissaatai naapertorlugit arnaq 23-nik ukiulik Qaqortup peqqissaaviani sapaatit akunneri marluk uninngareerluni, Ivaaqqami immikkoortortaqarfimmi najugarisimasaanut utertinneqareerpoq.
Politikerit amerlanerusut akisussaaffimmik tigusisariaqarput
- Pitsaanerusumik aaqqiissuteqartitsiniassagatta politikeriusugut akisussaaffimmik tigusisariaqarpugut. Inuit innarluuteqartut pillugit sullissinerup pitsaanerunissaa pillugu oqallittoqarnissaa kissaatigaara. Inuit innarluuteqartut angerlarsimaffiini najugaqartut ilaqutaallu toqqissisimasinnaaniassammata. Ivaaraq pillugu suliamut qaninnerusut politikerit aamma akisussaaffimmik tigusinissaat inissaminiippoq, Aaja Chemnitz oqarpoq.
- Pisoq pissutaalluni Ivaaqqamut tatiginninneq soorunami annikillilluinnarsimavoq, tamannalu aamma paasinarpoq. Taamaammat pitsanngorsaasoqartariaqavippoq. Najugaqarfimmi nakkutilliissutinik immiussissuteqarnissaq kisimi pineqanngilaq, aammali sulisut pikkorissarneqarnissaat pisariaqarpoq. Pisinnaaffikka malillugit akisussaaffimmik tiguseqataarusuppunga. Politikerilli allat aamma taamaaliortariaqarput, ataatsimoorluta aaqqiissutissanik nassaarsinnaaniassagatta, Aaja Chemnitz oqarpoq.
Meeqqanut, inuusuttunut ilaqutariinnullu kiisalu peqqissutsimut Naalakkersuisoq, Mimi Karlsen (IA) pisoq pillugu videomik siammartigassamik ikkussereerpoq. Tassani oqariartuutigalugu nunatsinni nunarsuulluunniit sinnera taama pisoqarsimanera akuersaarneqanngisaannassasoq.
Ivaaraq pillugu allaaserisat allat UANI atuarsinnaavatit.
