Ivaaqqami sulisut: Tupaqqavugut
Ulloq unnuarlu angerlarsimaffimmi najugaqartup kinguaassiutitigut atornerlunneqarsimanera Ivaaqqami sulisunit aalassassutigineqarpoq kamaatigineqarlunilu. Assingusumik misigisaqarnikuunngisaannarpugut, forstanderi oqaluttuarpoq.
Qaqortumi ulloq unnuarlu angerlarsimaffiup Ivaaqqap silataa eqqissisimalluinnarpoq. Najugaqartut eqqissillutik tissaluttoq isiginnaarsinnaarsinnaallugulu naasut tikki naamasinnaavaat.
Ivaaqqami pisimasoq pillugu forstanderi Sussi Larsen aamma pisortap tullersortaa Bibi Lund Kielsen Sermitsiaq.AG-mit oqaloqatigineqarput.
Ivaaqqap silataanisut angerlarsimaffiup ilua eqqissisimanngitsoq oqaluttuaraat.
- Tupaqqallutalu aalassaqqaqaagut kamarujussuarlutalu. Pisumut assingusumik misigisaqarnikuunngilanga, Sussi Larsen oqarpoq.
Angerlarsimaffimmi najugaqartup 23-nik ukiullip ernisup, sulisut qanigisaasullu ilisimanngisaanik naartulersimasumut tunngatillugu taamatut oqarpoq.
- Tamatta tuparujussuarpugut, aalassaqqaqaagut. Apeqquterpassuit takkupput uagut akisinnaanngisagut, tullersorti Bibi Lund Kielsen oqarpoq.
Angerlarsimaffimmi suleriutsit periutsillu misissorneqarput
Suliaq saqqummereersoq Isumaginninnermut Aqutsisoqarfik Qaqortumukarpoq, tassani Ivaaqqamik sulisut ataatsimeeqatigineqarput.
- Suleriutsit periutsillu misissorneqarput aamma sukateriffigut amerlasoorujussuupput, Sussi Larsen oqarpoq.
Sukaterinerit suussanersut suli inissinneqanngitsut forstanderip oqaatigaa.
- Oqaatigisinnaasara tassaavoq sulisut amerlineqarnissaat, annertunerusumik oqaaseqarsinnaanngilanga massakkut, kisianni sullippugut.
Innarluutillit angerlarsimaffianni aqqanilinnik inisimasoqarpoq. Angerlarsimaffik 15-it tikillugit inissaqarpoq, immikkoortortaqarfiit marluullutik. Najugaqartut tamarmik 18-t sinnerlugit ukioqarput. Ivaaqqami ingerlatsisut oqarput 30-t missaannik sulisoqarlutik, najugaqartulli qassiuneri apeqqutaallutik sulisorineqartut nikerarsinnaasarput.
Angajoqqaat Qaqortumut tikissimalerput
Ulloq unnuarlu angerlarsimaffimmi sulisut angajoqqaavilu ikiorserneqarput. Angajoqqaajusut taamatut ikiorsiisoqarnera tigulluarsimagaat, angerlarsimaffimmi ingerlatsisut oqaatigaat.
- Angajoqqaat arlallit Qaqortumut aamma tikipput. Ineqartut aaralugit asallugit pakkullugillu pivaat. Ineqartut tamanna toqqississutigivaat, Bibi Lund Kielsen oqarpoq.
Suliami susoqarpiarsimanersoq paasiniaasoqartoq, siunissamilu taamaasioqqittoqannginnissaa anguniarlugu sulisoqartoq, forstanderip naqissuserpaa.
- Politiit suliaq ingerlappaat, suliffeqarfittut soorunami isiginiartussaavarput aamma aallartereerpugut sukkut sukaterissanerluta. Qullersagut aamma peqatigalugit. Takuniarsarivarput suut aaqqitassaanersut aamma aaqqissuinerit aallartereerput, Sussi Larsen oqaluttuarpoq.
Suliaq pillugu allaaserineqartut uani atuakkit