Pinerluttoqarsimatillugu misissuisartoq Ivaaqqami suliaq pillugu: DNA-mik misissugassamik kikkut tamarmik tigusiffigineqarsinnaanngillat
Arnaq annertuumik innarluutilik Ivaaqqameersoq pillugu suliami DNA uppernarsaatissaqqissupilussuuvoq, Bent Hytholm Jensen pinerluttoqarsimatillugu siusinnerusukkut misissuisartuusimasoq taamatut oqarpoq. Politiilli tunngavissaqarluartumik pasitsaassaqarsimatinnagit kikkut tamarmik misissugassamik DNA-mik tigusiffigineqarsinnaanngitsut, taassuma erseqqissaassutigaa.
Kalaallit Nunaanni Politiinit Qaqortumiittumi ulloq unnuarlu paaqqinnittarfimmi Ivaaqqami pisimasoq maanna misissuiffigineqaleruttorpoq, suliami pineqartumi arnaq 23-nik ukiulik annertuumik innarluutilik tallimanngornermi meerartaarpoq.
Arnaq oqalussinnaananilu nammineerluni pisussinnaanngilaq.
Taamaammat arnap kinguaassiuutitigut innarlerneqarsimanera ilimagineqartariaqarpoq, Politiinillu nalunaarummik tigusaqartoqarsimanera uppernarsarneqarpoq, suliamulli atatillugu maannakkorpiaq allanik oqaaseqaateqartoqarsinnaanani.
DNA-mik misissuineq
Pinerluttoqarsimatillu ukiut qulikkuutaat pingasut sinnerlugit misissuisartuusimasup Bent Hytholm Jensenip oqaluttuaraa, innarlerneqarsimasoq nammineerluni innarliisimasup kinaaneranik oqaaseqarsinnaanngippat DNA uppernarsaatitut pingaaruteqartuussasoq.
- Qaammatit qulingiluat matuma siornatigut pinngitsaaliilluni atoqateqartoqarsimappat, pinerluffigisimasami uppernarsaataasinnaasunik nassaarniarnissap ajornartuunissaa takorloorsinnaavara, Bent Hytholm Jensen oqarpoq.
Aamma piffissap sivisuup ingerlanerani pinerluuteqartoqartarsimanissaa ilimanarsinnaavoq. Tamanna politiit misissuinerminni paasiniartussaavaat.
Taamaakkaluartoq ajornanngitsunnguamik paasisaqartoqarsinnaasoq, taanna nassuiaavoq.
- Meeqqap DNA-vata affaa arnamit pineqartumiissaaq. Affaalu ataataasuminngaanneerluni, taamaammat tamanna ajornanngitsunnguamik paasineqarsinnaavoq.
Pinerluttoqarsimatilluguli misissuisartup erseqqissaassutigaa, inunnit arnamik pineqartumik attaveqarsimasunik DNA-mik misissugassamik tigusisoqarnissaanik politiit piumasaqaannarsinnaanngitsut.
Malittarisassammi malillugit inuk pinerluuteqarsimasutut pasillerneqartariaqarpoq DNA-mik misissorneqarnissaa piumasarineqassappat, taanna oqaluttuarpoq.
- Taamatut piumasaqassagaanni suliami qularuteqartoqassanngilaq, takorloorsinnaavarali inuit quliugaangata qulingiluat pinngitsuunertik uppernarsarniarlugu DNA-minnik misissorneqarnissaq namminneerlutik piumasarissagaat.
Arnamut attaveqartarsimasut misissuiffigineqassasut
Inuk ataaseq arlallilluunniit DNA-minnik misissortikkusussanngippata, politiit nalilissavaat, tamanna imminermini unnerluussinissamut naammannersoq, Bent Hytholm Jensen nassuiaavoq.
- Misissuisartup nalilertussaavaa, pineqartoq arnamik piffissap ilaani atoqateqarsimanersoq.
Pinerluttoqarsimatillugu misissuinermi takussutissaasinnaasut - Bent Hytholm Jensen naapertorlugu - takuneqarsinnaajunnaarsimappata, misissuisut ukiup kingulliup ingerlanerani kikkut arnamut isersimanersut misissortariaqarpaat.
Kina arnamik paaqqinnillunilu isumaginnittuusimava? Pulaartut ilasiginnaavaat? Imaluunniit innuttaasut ilaat taamatut iliorsinnaasimasoq pineqarnerluni?
Apeqqutit tamakku misissuisut imminnut apeqqutigisarpaat, taanna nassuiaavoq.
Suliaq naammassineqarsinnaasutut isikkoqartoq
DNA - Bent Hytholm Jensen naapertorlugu - kisimi uppernarsaataasinnaanngikkaluartoq, taanna isumaqarpoq, suliami pineqartumi matumani aalajangiisuulluinnarsinnaavoq.
Bent Hytholm Jensenip oqaatigaa, suliaq ajornanngitsumik naammassineqarsinnaasoq, erseqqissaassutigaali, suliani taamatut ittuni paasiniaasoqartillugu arlalippassuartigut sunniutaasinnaasut misissorneqartartut.
- Paasiniagassaq naammassiuminaatutut isikkoqarpasinngilaq. Angutilli pinerluuteqarsimasup nassaarineqarnissaa pisariaqarpoq. Sulianik tassunga assigusunik takussutissartalinnik suliaqartarsimavugut, inulli pinerluuteqarsimasoq nassaarineqanngisaannarluni.