Inatsisartuni ilaasortaq: Tussiarfissuarmi sulinngiffeqarneq ullukinnermut nuutsilli
Tussiarfissuaq nalliuttutut atorunnaarsillugu ullukinnermi sulinngiffeqartalernissaq atulersinneqarsinnaava? Danskit naalakkersuisuisa tussiarfissuup nalliuttutut atorunnaarsinneqarnissaa sulissutigimmagu, Inatsisartuni ilaasortaq taama apeqquteqarpoq.
Ullukinnerup, 21. decemberip, nunatsinni sulinngiffittut atulersinneqarnissaanut oqallinneq suli ingerlajuarsinnarpoq.
Danskit naalakkersuisuisa tussiarfissuaq nalliuttutut atorunnaarsinniarpaat. Ilageeqarnermut ministerip erseqqissareerpaa nunatta nalliuttut nammineq aalajangiiffigisassarigai. Tamanna nunatsinni atorluarneqarsinnaavoq, assersuutigalugulu tussiarfissuarmi sulinngiffeqartarneq ullormut allamut nuutsinneqarluni, Inatsisartuni ilaasortaq taama isumaqarpoq, apeqqutigalugulu sulinngiffeqartarneq allamut nuunneqarsinnaanersoq.
Tassa ullukinnermut, 21. december.
- Danskit Naalakkersuisuisa tussiarfissuaq nalliuttutut atorunnaarsinniangaat atorunnaarsippassuk Nunatsinni ulloq taanna sulinngiffiusartoq ullukinnermut nuutsinneqarsinnaava?
Kristian Jeremiassen (IA) ilageeqarnermut Naalakkersuisumut, Peter Olsenimut paragraf 37 atorlugu taama apeqquteqarpoq.
Nunatta inuiattut ullui
Kristian Jeremiassenip apeqqutimini tunngavilersuutigaa nunarput ilageeqarnermi nalliuttunik ulloqartartoq, nunattali inuiattut ullorititaanik ataasiinnarmik nalliuttorsiortartoq, tassa inuiattut ullorsiornermi 21. juni.
- Ullukinneq tassaavoq siuaasatta ulloq nassaarisaat ulloq qaammariartulerfik
ullukinneq, ulloq aappalaartulerfittut pisortatigut atuuttussaatitaasoq isumaqarpungalu ulloq taanna naammanngittoq erfalasulerfittut aamma suli sulinngiffiusariaqarpoq ataatsimoorfissuarput kalaaliminertuuffippullu, Kristian Jeremiassen tunngavilersuivoq.
Ullukinnerup sulinngiffeqargiunissaanut apeqqut aatsaat siullermeerluni tusartinneqanngilaq. Inatsisartuni ilaasortat paarlakaattut paragraf 37 atorlugu tusagassiorfinnulluunniit nalunaaruteqarlutik ullukinnerup sulinngiffittut ulloritinneqalernissaa Naalakkersuisunut tusartittareersimavaat.
Tussiarfissuaq atorunnaarli
Inatsisartuni ilaasortap ilanngullugu nassuiaatigaa tussiarfissuaq aamma atorunnaarsinneqarsinnaasoq, ullukinnerlu inuiattut sulinngiffeqarnertut atuutsinneqalerluni.
Ullukinnerup sulinngiffeqarfiulernissaanut Naalakkersuisut inatsissatut siunnersuummik qaqugu saqqummiussaqassanersut ilanngullugu apeqqutigaa, tussiarfissuullu atorunnaarsinnissaanut sulisoqassanersoq aamma paasiniarlugu.
Naalakkersuisut siulittaasuat, Múte B. Egede oqaaseqareerpoq danskit politikkiannut akulerutissanani.