Kirkeministeri naqissusiivoq: Kalaallit Nunaata tussiarfissuaq atuutsiinnarsinnaavaa
Danmarkimi naalakkersuisut tussiarfissuup nalliuttuujunnaarsinnissaa suliarileruttorpaa. Kalaallit Nunaata Savalimmiullu ilagiit nalliuttui namminneq aalajangissagaat, tassunga atatillugu kirkeministeri danskit tusagassiorfiannut Jyllands-Postenimut taama oqarpoq.
Danmarkimi tussiarfissuup nalliuttuujunnaarsinnissaanik siunnersuut maannakkorpiaq annertuumik oqallisaavoq. Danskit 200.000-nit amerlanerusut marlunngornermi siunnersuummut akerliullutik atsiorput.
Siunnersuulli saqqummiunneqarlunilu akuerineqassasoq, ministeriuneq Mette Frederiksen marlunngornermi oqaaseqarpoq. Nalliuttup atorunnaarsinneqarneratigut naalagaaffiup karsianut 3 milliardit koruuninik pissarsiffiussasoq, siornatigut taassuma oqaatigereerpaa, taakku Illersornissaqarfimmut aningaasaliinernut atorneqassapput.
Maanili Kalaallit Nunaanni Savalimmiunilu nalliuttup atorunnaarsinneqarnissaa ilimananngilaq. Danskit kirkeministeriat Louise Schack Elholm (V) Jyllands-Postenimut taama ilisimatitsivoq. Ilageeqarneq Kalaallit Nunaata akisussaaffigilernikuugaa, taassuma oqaatigaa:
Naalakkersuisut: Atorunnaarsitsinissaq pilersaarutaanngilaq
- Ilageeqarneq pillugu suliassat akisussaaffiginngilagut, Kalaallit Nunaata Savalimmiullu tussiarfissuaq atuinnassanerlugu namminneq aalajangissavaat. Uagut tamanna akuleruffigisassarinngilarput, ministeri oqarpoq.
Sermitsiaq.AG-p Naalakkersuisut siulittaasuat, Múte B. Egede (IA) tamanna pillugu apeqquteqarfigaa til sagen:
Apeqqut: Danmarkip tussiarfissuaq Kunngeqarfimmi illersornissaq pillugu atorunnaarsinniarpaa, Kalaallit Nunaat aamma taamaaliorniarpa?
- Danskit politikkiannut aamma naggataatigut aalajangerneqartunut akulerunnianngilanga, allamik ilanngussassaqanngilanga, Múte B. Egede oqarpoq.
Nalliuttup Kalaallit Nunaanni atorunnaarsinneqarnissaanut pilersaaruteqartoqanngitsoq, Naalakkersuisut Jyllands-Postenimut ilisimatitsipput.
Danskit beskæftigelsesministeriata sapaatip-akunnerata siuliani inatsisissatut siunnersuummik saqqummiussaqarpoq, tussiarfissuup nalliuttuujunnaarsinnissaata kingunerinik isumaginnittumik. Ilaatigut qaammammusialinnut akissarsianut taarsiissutissanut tunngavoq, taakkulu ullormik ataatsimik sulinerulissapput.
1686-imili atulersoq
Inatsisissatullu siunnersuut taanna Kalaallit Nunaanni atuutissanngilaq.
Kisianni kirkeministerip kunngip aalajangersagaanik taaneqartartoq atorlugu nalliuttoq atorunnaarsinniarpaa, tamannalu Danmarkimi atuutilissasoq oqaatigaa.
Tussiarfissuaq 1686-imi kisermaassilluni naalakkersuinerup nalaani atulersinneqarpoq, Kunngeqarfimmilu nalliuttoq immikkuullarissuuvoq. Ukiut tamaasa poorskip kingorna tallimanngornerit sisamaanni nalliussineqartarpoq.