Ullormi ataatsimik sulinngiffeqarnerusalernissaq Kattip itigartippaa
Ullukinnermi, 21. decemberimi innuttaasut sulinngiffeqartarnissaannik atuutsitsilernissamik Naalakkersuisut pilersaaruteqanngillat. Ullukinneq pisortatigoortumik ullorsiorfittut 2018-imi atuutsinneqalerpoq.
IA tunuliaqutaralugu politikeri Peter Olsen Naalakkersuisunut arlalinnik apeqquteqarpoq. Apeqqutaani erserpoq eqqumiigisaqartoq, 21. december - ullukinneq - 21. junimut naligitillugu aalajangerneqarsimannginnera pillugu.
Katti Frederiksen, Ilinniartitaanermut, Kultureqarnermut Ilageeqarnermullu Naalakkersuisoq akissutimini ilisimatitsivoq Inatsisartut 28. november 2018 ullukinneq pisortatigoortumik ullorsiorfissatut aalajangermassuk, ullukinnerup nalliussisarnissaanut Aningaasanut Inatsimmi "immikkoorsisoqarsimanngitsoq".
- 21. juni pisortatigoortumik ullorsiorfigisaleratsigu qanoq aaqqitaava? 21.decemberimit allaanerua? Aap-iuppat suna taava allaanerussutigivaa, Peter Olsen aperivoq.
Katti Frederiksenip akissummini erseqqissarpaa 21. juni tassaasoq Nunatsinni Inuiattut ullorsiorfik, ullorlu taanna ullortunermi pisartoq.
Kaajallaasitaq innersuussutigaa
- Ulluni 1. maj, 5. juni aamma 21. juni sulisunut Namminersornerullutik Oqartussani aamma Kalaallit Nunaanni kommunini atorfeqartitanut sulinngiffeqarsinnaaneq pillugu Kaajallaasitaq (kaajallaasitaq nr. 3/92) naapertorlugu Kalaallit Nunaanni inuiattut ullorsiorneq nalunaaqutaq 00.00 aamma 24.00 akornanni ulloq naallugu ullortut nalliuttutut isigineqarpoq.
- Decembarip 21-at pisortatigoortumik ulluuvoq nalliussiffik, taamaammallu ulloq naallagu ullortut nalliuttutut isigineqarnani, Katti Frederiksen erseqqissaavoq.
Ilanngullugu qalleqqissarpaa ullukinneq pillugu siunnersuut 2018-imi suliarineqarmat siunniunneqarsimanngitsoq ullukinneq sulinngiffittut inissinneqarnissaa. Naalakkersuisullu tamassumunnga allannguuteqarnissamut pilersaaruteqanngillat.
Ullut nalliuttorsiutigineqartartut pillugit naalakkersuisoq Namminersorlutik Oqartussat Tipsernermut Lottornermullu aningaasaliissutaannit suliniutinut tapiissutinik qinnuteqaqqullugit kaammattorniarpai.