Imigassanik tuniniaanerit Sisimiuni nunaqarfinnilu marlunni matuneqarput
Illoqarfimmi tuniluuttoqarnera pissutaalluni imigassanik tuniniaanerit sassaalliinerillu tamarmik matuneqarnissaat Naalakkersuisut aalajangiuppaat.
Imigassanik tuniniaanerit sassaalliinerillu tamarmik Sisimiuni, nunaqarfinnilu Sarfannguini Itillimilu erniinnaartumik matuneqarput.
- Qeqqata Kommunianit imigassanik tuniniaanerup unitsinneqarnissaa kissaatigineqarmat, Inatsisartuni partiit siulittaasui isumasioqatigereerlugit Naalakkersuisut taamatut aalajangiipput, Naalakkersuisut tusagassiuutinut nalunaarumminni taama allapput.
Sisimiuni maanna tunillatseqqasut 57-iupput. Illoqarfimmi arfineq-pingasut tunillatsissimasut ullumi sisamanngornermi paasineqarput. Tunillaasuuneq arfininngormalli annertusiartupiloorpoq. Arfininngormat tunillatsissimasut katillugit 22-iupput, maannalu 35-inik ilasimallutik.
Imagassanik tuniniaanermik matusineq ataasinngorneq augustip 16-iat ilanngullugu atuutinneqassaaq.
- Maannarpiaq Sisimiuni Corona tuniluuppoq, tuniluunnermillu paasiniaanerup annertuumik ingerlanneqarnerani imigassamik matusigallarneq pissaaq, Naalakkersuisut paasissutissiipput.