Sisimiuni marluk napparsimavimmut unitsinneqarput sulilu tuniluuttoqarpoq

Sisimiuni arfineq-pingasut nutaat tunillatsissimasut arfininngornermi paasineqarpoq. Upernavimmi Tasiusamilu allanik tunillatsissimasoqanngilaq.

Sisimiuni tunillatsittut akornanni maanna misissuinerugallartunit takutinneqarpoq, matumani tuniluuffiit ilisimaneqareersut avataanni tuniluuttoqartoq.

- Suliffeqarfiit sullissiviillu arlallit, kiisalu napparsimmavik tunillaaviusimasunut ilaapput. Tunillatsissimasut amerlanersaat kapitissimanngillat imaluunniit ataasiaannarlutik kapitissimallutik. Pingaartumik inuusunnerusut tunillatsittarput, taamaalillutillu tuniluunnermik ingerlatitsisuullutik, oqartussat tusagassiuutinut nalunaarumminni paasissutissiipput.

Tunillatsissimasut amerlinerisa saniatigut tunillatsissimasut marluk Sisimiut napparsimaviannut unitsinneqarput. Taakkua suli Sisimiuni katsorsarneqarsinnaasut oqartussat paasissutissiissutigaat. Tassa aappaa katsorsarneqarpoq, kisiannili suli inuunerminik ulorianartorsiortutut oqaatigineqarsinnaanngilaq, taamaattumillu tunillatsissimasut Sisimiuniiginnarallarsinnaapput.

Sisimiuni misissuisarfik pilersinneqaleruttorpoq

Corona pillugu Allattoqarfik tuniluunnermik annikillisaaniarluni attaveqarfigineqarsimasunik ujartuivoq. Illoqarfimmilu sumiluunniit tunillatsittoqarsinnaasoq erseqqissaatigineqarpoq.

- Tuniluunneq killilerneqarsinnaassappat misissuisarfimmik allamik ammaasoqarnissaa pisariaqarluinnarpoq. Taamaattumik Qeqqata Kommunia suleqatigalugu Sisimiuni misissuisarfimmik pilersitsisoqarnialerpoq. Kommuni atortussanik sulisussanillu atugassiinissaminik neqerooruteqarpoq, oqartussat paasissutissiipput.

Aasianni Avannaanilu nutaarsiassaq nuannersoq

Sisimiuni tuniluuttoqaleruttornerani, kisitsisit ajunnginnerumaartut avannaani takuneqarsinnaapput. Tuniluuttoqaqqinneranimmi malunnartoqanngilaq.

- Avannaanili pissutsit ingerlalluarput. Tasiusami tuniluuttoqaqqinneranik malunnartoqanngilaq. Aamma Upernavimmi tuniluunneq maannamut killilerneqarsimasutut isikkoqarpoq, tunillatsissimallutik tuniluussinnaasut ikittuinnaallutik. Kullorsuarmi napparsimasoqarneranik nalunaaruteqartoqarnera peqqutigalugu bioanalytikeri Kullorsuarmut misissugassanik katersuiartortinneqarpoq. Misissuinerit 15-it tamarmik tunillatsissimanermut ersiuteqanngillat. Maannarpiaq nunaqarfinnut allanut tuniluuttoqarneranik takussutissaqanngilaq, oqartussat allapput.

Taamaakkaluartorli suli Aasianni malinnaasoqassaaq. Aasianni, Kangaatsiami Qasigiannguinilu misissuisoqarnissaa pilersaarutaavoq.

- Suliniutinik tamanik nukittorsaanissaq siunertaralugu misissuisarfimmik pilersitsinissaq pillugu Kommune Qeqertalik suleqatigineqarpoq.

Arfininngornermi kisitsisit kingulliit ima isikkoqarput:

• Tunillatsissimallutit tunillaasinnaasut: 57
• Tunillatsissimasut katillugit: 168
• Aaqqittutut nalunaarutigineqartut katillugit: 108
• Misissugassanik tigusiffigineqartut katillugit: 44.501
• Napparsimmavimmi uninngasut katillugit: 2
• Toqusut katillugit: 0