Allat 20-t tunillatsissimasut paasineqartoq
Sisamanngornermi tunillatsissimasut amerleqqissimasut Nunatsinni Nakorsaaneqarfimmit paasissutissiissummi atuarneqarsinnaavoq.
Tuniluuttoqarnerani tunillatsissimasut amerlassusaat 201-iusimariarlutik 221-nngorsimapput. Tassa pingasunngornermiilli tunillatsissimasut 20-nik ilaqqissimagamik.
Nunatsinni Nakorsaaneqarfiup nittartagaani kisitsisit nutaat naapertorlugit, maanna nunami maani coronaqartut 86-inngorsimapput.
Ullumi aamma Sisimiuni killuup tungaanut ingerlasoqarpoq, Sisimiunimi tunillatsisimasunik nutaanik arfineq-pingasunik paasisaqartoqarsimavoq.
Namminersorlutik Oqartussanit ilisimatitsissutigineqarpoq, Sisimiuni tunillaassuisut assigiinngitsuusut, taakkunannga arlallit kikkuuneri ilisimaneqaratik.
Sisimiuni nassaarineqartut saniatigut Nuummi arfinillit, Aasianni sisamat aamma Kangaatsiami Qaqortumilu tamarmik immikkut ataaseq tunillatsissimasut nassaarineqarput.
Umiarsuarmi inuttat arfinillit tunillatsissimasut
- Tunillatsissimasut Sisimiut avataaniittut amerlanersaat Sisimiuni tunillatsissimapput. Taakkunannga ilaatigut umiarsuarmi inuttat arfinillit tunillatsissimapput. Inuttat tunillatsissimasut maanna nunami mattusimatinneqarput aammalu inuttat sinneri umiarsuarmit nioqqusaanngillat. Tamanna malittarisassat atuuttut naapertorlugit oqartussaasunik qanittumik suleqateqarnikkut ingerlanneqarpoq, Namminersorlutik Oqartussat allappput.
Nunatsinni Nakorsaanerup Henrik L. Hansenip oqaatigaa tuniluuttoqarnera ilungersunartuusoq:
- Pissutsit suli ilungersunartutut isigisariaqarpagut. Sisimiuni eqqaanilu inuiaqatigiinni tuniluuttoqangaatsiarpoq, aammalu siusinnerusukkut Sisimiuniit nunap sinneranut tuniluuttoqarnera takoreerparput.
- Innuttaasut tamarmik 2 meterinik ungasissuseqarlutik qanillinaveersaarpata, katerittunut akulerunnaveersaarpata, errortorluartarpata tuniluunnermik killilersueqataasussaavugut, kisiannili aamma tamatta oqartussaasut innersuussutaannik malinninnissarput pisariaqarpoq, Nunatsinni Nakorsaaneq Henrik L. Hansen tusagassiorfinnut nalunaaruteqarnermi oqarpoq.
Nunatsinni Nakorsaanerup ilanngullugu erseqqissaassutigaa, nappaammut ersiuteqartut tamarmik angerlarsimaannarnissaat piaarnerpaamillu misissortinnissaat pingaaruteqarluinnartoq.
