Ilinniartut ineqarfiani ikuallattoorneq: Putsumut kalerissaaruteqartarnissaq piumasaqaataalissaaq
Illuliornermut malittarisassat nutaat Naalakkersuisunit suliarineqalerput, malittarisassani nutaani piumasaqaataalissaaq putsumut kalerrisaarutinik ikkussuisarnissaq.
Taama nalunaaruteqartoqarpoq Sisimiuni ilinniartut inaat ikuallattoq putsumut kalerrisaaruteqanngitsoq paasinarsimmat. Ilinniartut inaanni najugaqartut inimit anisinnaaqqarsimapput, putsumilli ipisitaangajassimallutik.
Sermitsiaq.AG-p ineqarnermut Naalakkersuisoq, Karl Frederik Danielsen (S) paasiniaaffigaa illuliornermut malittarisassat nutarterneqassanersut, nutarterneqassappatalu tamanna qaqugu pissanersoq.
- Illuliornermut malittarisassat nutaat suliarineqarput, taakkununngalu inissiani nutaani, akunnittarfinni ilinniartunullu inissiani putsumut kalerrisaarutinik, qaammaqqusersuutinut attavilikkanik ikkussuussisarnissamut piumasaqaatit ilanngunneqassapput, Karl Frederik Danielsen allakkatigut akissuteqarpoq.
Naalakkersuisoq ilisimatitsivoq illunut pioreersunut taamatut piumasaqaateqarsinnaaneq tunngavissaqarnersoq nalilersorneqartoq, Illut pioreersut illuliornermut malittarisassat 2006-imeersut atorlugit suliaapput.
Ilanngullugu naalakkersuisumit erseqqissaatigineqarpoq illuliornermut malittarisassat nutaat tusarniussutigineqareerpata atuutsilersinneqassasut. Tamanna siusinnerpaamik 2020-mi pissaaq.
Innersuussineq
Naalakkersuisoq erseqqissaavoq illuliornermut malittarisassat atuuttut malillugit ”ikuallattoornermut naammaginartumik toqqissisimanissaq aammalu ikuallannerup illunut saniliusunut siaruaatinnginnissaa anguniarlugu” kommunalbestyrelse piumasaqaateqarsinnaammat.
Tamanna isumaqarpoq kommunalbestyrelse upalungaarsimasut suleqatigalugit naliliisimagunik, putsumut kalerrisaarummik, kalerriinermut atortunik allanilluunniit ikkussuisoqartariaqartoq, taakkuninnga ikkussinissamik sanatitsisumut inassuteqarsinnaasoq.
- Tamatuma saniatigut illunik siniffissalinnik piginnittunut atuisunullu tamanut kajumissaatigiinnarsinnaavara, illut naammaginartumik toqqissisimanarnersut ikuallattoornissamullu isumannaallisagaanersut, tamatuminngalu kalerrisaarisoqarsinnaanersoq misissortaqqullugu, allassimavoq.
Illuliat mikinerit
Tusagassiutinut nalunaarummi nassiussami ilisimatitsissutigaa Sisimiuni ikuallanneq ilinniartut inaanni mikinermi pisimasoq. Ilinniartut inaanni minnerni, amerlanerpaamik inunnut qulinut siniffissalimmi, putsumut kalerrisaarutinik allanillu kalerrisaarutinik ikkussisoqarnissaannut maanna piumasaqaateqartoqanngilaq.