Bagger: Kollegiani tamani putsumut kalerrisaaruteqassaaq

Ilinniartitaanermut naalakkersuisoq Ane Lone Bagger kollegianut tamanut putsumut kalerrisaarutinik atortulersuisoqarsimaneranik qulakkeerinninnissaq pillugu piumasaqaammik nassiussisimavoq

Ane Lone Baggerip kollegiani putsumut kalerrisaaruteqannginneranik suliaq ilungersunartorujussuartut isumaqarfigaa.

Sisimiuni kollegiami ikuallattoqarnerani paasinarsivoq, putsumut kalerrisaarutinik ikkussuisoqarsimanngitsoq, ineqartullu marluk iluatsitsinerinnakkut putsumik toqunartumik annikitsuinnarmik najuussuisimasut.

Sisimiuni upalungaarsimanermut pisortaq Ole Kreutzmann Sermitsiaq.AG-mut paasissutissiisimavoq, kollegiat putsumut kalerrisaarutinik atortulersorneqarsimanissaannik sanaartukkanut maleruagassani piumasaqaateqanngitsoq.

Taamaattumik Ane Lone Bagger ilinniarfeqarfinnut tamanut piumasaqaamik nassiussisimavoq, kollegiat qassit putsumut kalerrisaaruteqannginnerannik naatsorsuisoqarnissaanik.

- Tamatuma peqatigisaanik piumasaqaatigaara, sumiiffinni putsumut kalerrisaaruteqanngitsuni putsumut kalerrisaarutinik ikkussuisoqassasoq. Sanaartukkanut maleruagassani tamanna piumasaqaataanngikkaluarpoq, kisianni kollegiani tamani putsumut kalerrisaarutinik ikkussuinermik suliaq maanna aallartipparput, Kangerlussuarmi ataasinngornermi unnukkut innuttaasunik ataatsimiititsisoqarnerani oqarpoq.

Piumasaqaataanngitsoq

Sermitsiaq.AG-mit tallimanngormat oqaluttuarineqarpoq, nunatsinni kollegiani inunnit 2.500-ngajannit najugaqarfigineqartuni kollegiat qassit putsumut kalerrisaaruteqarnerat ilisimaneqanngitsoq.

Aamma atuaruk: Ilinniartut ineqarfiat ikuallattoq putsumut kalerrisaaruteqanngitsoq

Powered by Labrador CMS