ICC akerliliisoq
ICC: FN-ip nunap inoqqaavinut nalunaarutaannik Naalakkersuisut unioqqutitsipput
Uranimik piaaneq innuttaasunik taasisitsinermik toqqammaveqartariaqarpoq, taamaanngippat Naalagaaffiit Peqatigiit demokratiimut tunngasumiik nalunaarutaanut unioqqutitsisoqassaaq, Nunatsinni ICC-mi siulittaasoq, Hjalmar Dahl isumaqarpoq
Radioaviisi tallimanngormat oqaluttuarpoq, Steen Lyngep Atassummeersup isumaa allanngorsimasoq, uranimillu qallueqqusiunnaavinnissamut atorunnaarsitsinerup taasisitsissutigineqarnissaa suliniutiginiarunnaaraa.
Aatsitassaqarnermut naalakkersuisup nutaap, Randi Vestergaard Evaldsenip (D), taasisitsinissaq aamma kissaatiginngilaa, naak Naalakkersuisut siulii qineqqusaarnerminni najugaqartut uranimut taasisinneqarnissaat neriorsuutiginikuugaluaraat.
Atuaruk: Isummani mumisippaa: Steen Lyngep uranimut siunnersuunni tunuartippaa
Atuaruk: Aatsitassanut naalakkersuisunngorlaaq: Innuttaasut taasitinneqarnissaat puiguinnarsiuk
Taamatulli saqinneq uggornarluinnarpoq, ICC Kalaallit Nunaat taama isumaqarpoq.
FN-ip nalunaarutaanik unioqqutitsineq
Inuit Issittormiut Siunnersuisooqatigiiffiat uranimik taasisitsinissamik naaggaarneq uggornartutut oqaatigaa, aammalu FN-ip nunap inoqqaavinut peqataatitsinissamut nalunaarutaanik unioqqutitseratarsinnaanertut taallugu.
- Uranimik piiaanissamik pilersaarut pillugu paasissutissiinerit eqqortut tunngavigalugit nunatsinni innuttaasut aalajangeeqataanissaminni isummernissaminnut taasitinneqarnissaat ICC Kalaallit Nunaannit inassutigineqarpoq, ICC Kalaallit Nunaanni siulittaasoq, Hjalmar Dahl oqarpoq.
Innuttaasut isumaqatigiissapput
Taanna nunat inoqqaavisa pisinnaatitaaffii pillugit Naalagaaffiit Peqatigiit nalunaarutaanni 2007-meersumut innersuussivoq 'taamatullu nalunaarutini avammut suaarutigineqartuni allarpassuarni', oqaatsit 'Free Prior andInformed Consent' atorneqarput.
Tamannalu ima paasineqassalluni innuttaasut kiffaanngissuseqartumik, sioqqutsisumik paasissutissiinernillu tunngaveqartumik pilersaarutaasunut annertunerusunut akuersisinnaanersut siunertaralugu taasisitsinikkut peqataatinneqarnissaat.
Demokratii tunngaviunngitsoq
Hjalmar Dahlip erseqqissaatigaa, ICC-p Kuannersuarni uranisiornissamik pilersaarummut kisimi peqataatitsinissamut kissaateqarani, aammali Nunatsinni pilersaarutaasut annertuut suugaluartulluunniit tungaasigut innuttaasut aalajangiiniarnerni peqataatinneqarnissaat sulissutigalugu.
- Uranimik piiaaniarneq pilersaarutaavoq annertuumik sunniisussaq aporaaffioqisorlu, taamaammallu innuttaasunik taasisitsinissamut periarfissap atorneqarnissaa kingusinaanngilluinnarpoq, siulittaasoq oqarpoq.
Atuaruk: NGO-t isornartorsiuipput: Savaatillit tusaaneqanngillat
Paasissutissaq oqaatigineqarsinnaavoq, Steen Lyngep (A) immaqa urani pillugu taasisitsinissaq suli sulissutiginiaraa - kisianni allatut iliorluni.
Tallimanngormat taanna KNR-imut nassuiaanermini oqarpoq, inuit taasitinneqarnissaat suli kissaatigalugu, taamaattorli Kalaallit Nunaanni uranimik qalluinermik suliaqartut killilimmik suliaqarnissaannut tamanna tunngaannassaaq.
Aamma atuaruk: Urani pillugu ICC Qaqortumi ataatsimiissaaq