aatsitassarsiorneq

NGO-t isornartorsiuipput: Savaatillit tusaaneqanngillat

Savaatillit peqatigiiffiat 30-nik ilaasortaqartoq Naalakkersuisunut, Kommune Kujallermut Greenland Minerals and Energy -mullu ernumassutitik pillugit saaffiginnittarsimaraluarnerat kinguneqartinneqarsimannginneri NGO-nit ernumagineqarpoq

NGO-ni ataqatigiissaarisuullunilu ICC Greenlandimi siulittaasoq Hjalmar Dahl

(Allaaserineqartoq nalunaaqutaq 16.17 nutarterneqarpoq)

Naalakkersuisut, Kommune Kujalleq aamma Greenland Minerals and Energy savaatilinnut paasissutissiinerusariaqarput.

Sumulluunniit attuumassuteqanngitsut, NGO-t, taamatut oqariartuuteqarput.

Savaatillit siunissartik pillugit ernumassutaat tusaaneqartariaqaraluartut NGO-mi tusagassiutinut nalunaarutigaat. Kuannersuarnimi aatsitassarsiortoqarsinnaanera savaatilinnit ernumassutigineqarpoq, savaatillimmi siunissaanut aatsitassarsiortoqarsinnaanera annertuumik kinguneqarsinnaavoq.

Pitsaanerusariaqartoq
Tassami savaatillit peqatigiiffiat 30-nik ilaasortaqartoq, Kuannersuarni aatsitassarsiortoqarsinnaaneranut atatillugu ernumassutitik pillugit Namminersorlutik Oqartussanut ammasumik allagaqaateqarsimapput. Tassami inuussutissarsiutaannut tamanna annertuumik eqquisinnaavoq. Aatsitassarsiortoqassappat qanoq kinguneqarsinnaanersoq apeqquteqaateqarsimapput. Allagaqaatertik Kommune Kujallermut aamma Greenland Minerals and Energy-mut nassiuppaat.

Savaatillit Naalakkersuisunit allagaqaamminnut akineqarput apriilip 16-ani. Apeqqutigineqartut akineqarnissaannut sulisoqartoq allaffigineqarput. Kisianni Kommune Kujallermit aamma Greenland Minerals and Energymit suli akineqanngillat.

- Savaatillit ernumassutaat tusaaneqassanngippat ajorpallaassaaq. Inuussutissarsiutaannummi ernumassutitik pillugit paasitinneqarnissamik pisinnaatitaaffeqarput, ICC Greenlandimi siulittaasoq NGO-nilu ataqatigiissaarisoq Hjalmar Dahl, tusagassutinut nalunaarummi oqarpoq.

Oqaloqatigiittoqartariaqartoq
Innuttaasut peqataatinneqarnerat pitsaanerulersinniarlugu ICC Greenland, Earth Charter Greenland, Transparecy International Greenland aamma WWF Verdensnaturfonden suleqatigiipput.

- Akerleriit oqaloqatigiittarnissaat pingaaruteqarpoq. Oqaloqatigiittoqanngikkaangammi eqqoriaanernik pilersitsisoqartarpoq. Innuttaasut peqataatinneqarnerunissaat Naalakkersuisunit oqariartuutigineqartareerpoq. Kisianni peqataatitsinermi tusarnaartoqarlunilu akissuteqartoqartarpoq, aamma ammanerusumik sulisoqartarpoq. Ajoraluartumik uani suliami taamatut ersiuteqartoqanngilaq, Hjalmar Dahl oqarpoq.

Savaatillit paasisaqarnerunissartik pillugu paasissutissanik pissarsinerorusinnerat NGO-nit tapersersorneqarpoq. Greenland Minerals and Energy piumaffigineqarpoq Kuannersuarni aatsitassarsiornermi avatangiisit qanoq eqqorneqarsinnaanerannut nalunaarusioqqullugit.

Powered by Labrador CMS