inuit-suleqatigiit
Urani pillugu ICC Qaqortumi ataatsimiissaaq
Nunat tamalaani ICC-p siulersuisuisa ataatsimeersuarnissat saqqummiuteqammerpaat, ataaseq ilinniarnermut tunngasoq Nunatsinni ingerlanneqassaaq. Aammalu nunat tamalaat urani pillugu ataatsimiinneq Qaqortumi ingerlanneqassaaq
ICC-mi siulersuunerit sapaatip akunnerani kingullermi Canadami illoqarfiit pingaarnersaanni Ottawami ataatsimiipput, siunnersuisooqatigiit ukiuni sisamani tulliuttuni suliniutit angusassatut naatsorsuutigisaat oqallisigineqarput.
Kalaallit Nunaanni ICC-mi præsidentiusoq, Hjalmar Dahl, ataatsimeersuarnissat pingasut ataatsimiittoqarnerani pilersaarusiorneqartut oqaluttuarpoq.
Ilinniartitaaneq 2017-imi oqallisaassasoq
Ataatsimeersuarnerni qulequttat tassaapput Issittumi pisuussutit uumassusillit pillugit ataatsimeersuarnissaq, ukioq manna novembarip qaammataani Canadami ingerlanneqartussaq, aningaasarsiornikkut ineriartorneq pillugu ataatsimeersuarnissaq, ukioq 2017-imi februarip qaammataani Alaskami ingerlassassatut pilersaarutigineqarpoq. Kiisalu inuit ilinniartitaanerat pillugu ataatsimeersuarnissaq ukioq 2017-imi Nunatsinni ingerlanneqartussatut pilersaarusiorneqartoq.
Siulersuisut tulliani ataatsimiinnissaat Nunatsinni 2016-imi aggustip naanerani Qaqortumi ingerlanneqassaaq.
Atuaruk: Pikialasorsuup pingaassusaanik misissuisussamik ICC ataatsimiititaliamik pilersitsivoq
Urani pillugu Qaqortoq ataatsimoortitsissaaq
Inuit najugaqarfiini uranisiorneq saniatigut sammineqarnissaa, siunnersuisooqatigiinni nunani tamalaani siulersuisut aalajangiuppaat.
Ataatsimiinnermilu ICC Canadami præsidentip, Duane Smithip, ukiut 17-it ICC-imi sulereerluni tunuarnini ataatsimiinnermi nalunaarutigaa.
Qinersisoqangajalersoq
Duane Smith sapaatip akunnera kingulleq nunap immikkortuani Inuvialuit Regional Corporation (IRC)-mi Nellie Cournoyea taarserlugu siulittaasutut pisortaanertullu toqqagaavoq. Taassuma taartissaanik toqqaanissaq siunertaralugu ICC Canada maannakkorpiaq suliniuteqarpoq.
Atuaruk: ICC EU-mi sunniuteqaqataarusuttoqICC EU-mi sunniuteqaqataarusuttoq