IA: USA-p aningaasaliiniarnera pillugu isertuussineq unitsilli
USA-p mittarfinnut nutaanut pingasunut aningaasaliinissamik pilersaaruteqarnera pillugu nunanut allanut sillimaniarnermullu ataatsimiititaliaq ilisimatinneqarsimannginnera Inuit Ataqatigiit isornartorsiorpaat.
USA-p mittarfinnut pingasunut nutaanut aningaasaliinissamik soqutigisaqarnera paasineqarmat, Inuit Ataqatigiinnit Inatsisartuni nunanut allanut sillimaniarnermullu ataatsimiititaliami ilaasortat nunanut allanut tunngasunut naalakkersuisoq, Ane Lone Baggerip siunersiorneqarnissaa piumasaraat.
Pentagonip mittarfissat nutaat pingasut tikeraarsimagai nunanut allanut tunngasunut naalakkersuisoqarfiup uppernarsareeraalu, Sofia Geislerip aamma Mimi Karlsenip Naalakkersuisut isornartorsiungaatsiarpaat.
USA-p mittarfinnut pingasunut nutaanut aningaasaliinissamik pilersaaruteqarnera pillugu ataatsimiititaliap peqataatinneqalernissaa maanna piumasaraat.
- Tupaallaatiginngitsuunngilarput atuaratsigu mittarfiit pingasut pillugit misissuinissamut USA Nunatsinniit attaveqarfigineqarsimammat, tamannalu aasarli pisimalluni, aalajangiinissarlu qanittuaranngorsimasoq. Suli tupigusunnarnervoq Nunanut Allanut Naalakkersuisoqarfiup tusagassiuutitigut uppernarsarmagu mittarfiit pineqartut mittarfiliorfigineqartussat amerikarmiunit tikeraarneqarsimasut, IA-meersut marluk allapput.
Ataatsimiititaliaq ilisimatinneqanngilaq
IA naapertorlugu Inatsisartuni ataatsimiititaliaq susassaqartoq ilisimatinneqarsimanngilaq, tamannalu politikerinit marluusunit tupigusuutigineqarpoq.
- Tupaallaataavallaarnavianngikkaluarpoq susoqarnera pillugu Nunanut Allanut Sillimaniarnermullu Ataatsimiititaliaq sukumiisumik ilisimatinneqarsimasuuppat. Akerlianilli paasissutissat tigussaasut
Naalakkersuisuniit Ataatsimiititaliamut tunniunneqartut ikittuararsuusimapput, tamannalu naammaginanngilluinnarpoq, ataatsimiititaliami siulittaasup tullia Mimi Karlsen aamma ataatsimiititaliami ilaasortaq Sofia Geisler nangillutik nalunaarutiminni allapput.
- Pissusissamisoorsinnaanngilaq ataatsimiititaliami ilaasortat
tusagassiuutit aqqutigalugit malinnaassariaqassappata Nunatta avammut attaveqarnera pillugu apeqqutit eqqartorneqartillugit. Akulikippallaanik pisalerpoq tusagassiuutit aqqutigalugit
ilisimasariaqakkatsinnik pissarsisarnerput.
Pele Broberg ataasinngornermi aamma tusagassiutinut nalunaaruteqarpoq, USA-p nunatsinni mittarfinnut akulerutinnginnissaa piumasaralugu.
