PN: USA mittarfinnut nutaanut akulerutissanngilaq

Nuummi, Ilulissani Qaqortumilu mittarfissat sakkutooqarnikkut siunertanut atorneqassanngillat. Pele Broberg Partii Naleqqameersoq taamatut isumaqarpoq.

Taamatut nalunaaruteqartoqarpoq mittarfiannut nutaanut pingasunut USA aningaasaliissuteqarnissamik eqqarsaateqartoq KNR-p oqaluttuarimmagu. USA-p illersornissamut ministeriata tullia siorna nalunaaruteqarpoq, Kalaallit Nunaanni mittarfinnut inuinnarnit sakkutuunillu atorneqarsinnaasunut aningaasaliissuteqarnissamik soqutiginnillutik.

Tamannali Partii Naleqqamit nuannerineqarpallaanngilaq.

- Partii Naleqqamiit Naalakkersuisut sakkortuumik kaammattorpavut, Nuummi, Ilulissani Qaqortumiluunniit sakkutoorqarnermut aningaasaliissuteqartoqarnissaanik pisariaqartitsisoqannginneranik nalunaaruteqaqqullugit, Pele Broberg (PN) tusagassiorfinnut nalunaaruteqarnermi oqarpoq.

- Danmarkimit Kalaallit Nunaat sakkutuulersorfigineqassasoq suli kissaatigineqarpat, nunatta ilanngunneqarnissaanik Naalakkersuisut akuersaartillugit, Partii Naleqqamiit eseqqissaatigisariaqarparput Danmarkip Namminersorneq pillugu inatsimmik malinninnissaa naatsorsuutigalugu aamma akisussaaffimminnut atatillugu aningaasartuutinik tamanik isumaginninnissaa!

- Aamma erseqqissumik piumasaqaatigaarput Kalaallit Nunaanni aningaasaliissutaajumaartut tamarmik, Nuummi, Kangerlussuarmi allamiluunnii mittarfinnut aningaasaliissutaappata, naalagaaffeqatigiinnit ullormit aniffitsinnit Kalaallit Nunaannut tutsinneqartarnissaat. Tassa Danmarkimit Amerikamilluunniit aningaasaliissutit pineqaraluarpatalluunniit.

- Taamaammat Partii Naleqqamit erseqqissaatigissavarput, Kalaallit Airportsip “marloqiusamike” atorneqartussanngorlugu aaqqissuunniarneqarnera akuersaarsinnaannginnatsigu.

Pele Broberg (PN) isumaqarpoq, Kalaallit Nunaanni allat iliuuseqartarnerat qisuariarfigiunnaarlugu susoqarniarnersoq nammineq oqaasertalertariaqaleripput.

- Namminersorneq pillugu iatsit innuttaasut taasitinneqarnerisigut akuerisaanikuugaluartoq, Naalakkersuisuni angutit/arnat siuttuusimasut Issittumut Periusissimut oqaasertaliisinnaasimanngitsut, suliassarli Danmarkimut tunniutiinnarsimagaat. Naak Kalaallit Nunaanit naalagaaffeqatigiinni issittumiikkaluartoq.