KNR: USA-p mittarfissat nutaat pingasut misissorai
Amerikamiut Kalaallit Nunaanni mittarfinnut aningaasaliinissamut februaarimi aalajangersinnaapput, tusagassiorfik allappoq
Ilulissani, Nuummi Qaqortumiluunniit mittarfissat aningaasaliiffigineqarsinnaanersut USA-mi illersornissaqarfiup Pentagonip misissorpai. KNR allappoq.
USA-mi illersornissamut ministerip Kalaallit Nunaanni mittarfiit sakkutuunit sakkutuujunngitsunillu atorneqarsinnaasut aningaasaliiffigineqarnissaanut piareeqqaneq pillugu nalunaarut atsiorsimallugu 2018-imi septembarip qaammataani nalunaarutigaa.
- Naalunaarutip matuma Amerikami illersornissamut ministeriaqarfiup Kalaallit Nunaanni aningaasaliinissamut soqutiginninnera uppernarsarpaa, tamatuma nunap immikkoortuani isumannaallisaaneq nukittorsarsinnaavaa, eqqortumik qisuariarnissaq nukittorsarlugu, aamma nunap immikkoortuani eqqissisimaneq attallugu, sakkutuunit sakkutuujunngitsunillu atorsinnaassalluni, nalunaarummi tamanna oqaatigineqarpoq.
Taamanili eqqarsaatigineqarsimavoq Pentagon mittarfinnut sorlernut aningaasaliissuteqarniarnersoq. Mittarfissat pingasut pineqannguatsiartut takuneqarsinnaasimavoq, maannalumi tamanna Amerikamiunit uppernarsarneqarpoq.
- Mittarfiit pingasut Kalaallit Nunaata misissoqquai. Ilulissani, Nuummi Qaqortumilu mittarfiit misissoqquai. Aasaq misissorpavut, massakkullu aalajangerniarsarileruttorpugut, Esther McClure, Amerikap illersornissamut ministerieqarfiata, Pentagonip, NATO-mi aamma Europap avannarpasissortaani kippasissortaanilu sillimaniarnermut politikkianik suliaqartoq KNR-mut oqarpoq.
Ifølge McClure naapertorlugu Kangerlussuaq ilanngullugu misissorneqarsimavoq, periarfissarli tassani itisilerlugu iserfigineqarsimanngilaq.
Præsidentip missingersuusiai Det Hvide Husimit saqqummiunneqarpata, sorliit aningaasaliiffigineqarniarnersut takuneqarsinnaalissaaq. Tamanna februaarip qaammataani nalinginnaasumik pisarpoq.