Hardenberg: Air Greenlandip pisiarineqarnissaa paasisassaanngilaq
Ukiut arlaqanngitsut matuma siorna akia appasinnerujussuugaluartoq, sooq Naalagaaffik aamma SAS aktiaatiminnut 461 millionit koruuninik pissarsissanersoq, Svend Hardenbergip paasiuminaatsippaa.
Timmisartukkut angallannermik ukiunik qulinik misilittagaqartoq Svend Hardenberg, maanna SAS-ip aamma Naalagaaffiup Air Greenlandimit piginneqataassutaasa pisiarineqarnissaannut, taamaalilluni Namminersorlutik Oqartussat kisermaassillutik piginnittunngornissaannut oqallinnermut ilannguppoq.
Piginneqataassutsit 37,5 aamma 25 procentit marluk, SAS-ip aamma Naalagaaffiup akornanni agguaanneqartussat katillugit 461 millionit koruuneqarnissaat isumaqatigiissutaasoq, Sermitsiaq.AG-p tusarpaa.
- Maanna akip ilisimatitsissutigineqartup qanoq naatsorsorneqarsimanera ilisimannginnatsigu nangaanartoqarpoq. Naatsorsueriaatsillu amerlasoorpassuupput. Timmisartortitseqatigiiffiup nalinga piviusoq maanna akinit nalunaarsorneqarsimasunit aamma pisisartut bilitsimut ullumikkut qanoq akileerusunnerannit taamaallaat naatsorsorneqassanngilaq. Timmisartortitseqatigiiffiup akia piviusoq pisisartunit aningaasat ingerlaarnerannit pingaarnertut isiginiarneqassaat – pisisartut ullumikkut aamma aqagu bilitsimut qanoq akileerusunnerannik paasillugu, Svend Hardenberg, 2000-mit 2006-imut Air Greenlandimi pisortat allattoqarfianni aamma sulisoqarnermut pisortaasoq.
Aqqutini taakkunani nutaanik mittarfeqalernermi unammilleqatigiittoqalernissaa naatsorsuutigineqarnissaa tulluartuussasoq, taanna oqarpoq, tamatumalu Air Greenland tatisimaneqalersissavaa.
- Mittarfiit nutaat piareerpata isertitanut tunngavissat nalunaarsorneqartut allanngornerinik tamanna kinguneqassaaq, Svend Hardenberg oqarpoq.
Aki piviusorsiortuunngitsoq
- Naalakkersuisut siulittaasoqarfiata naalakkersuisoqarfianiikkama SAS-ip Air Greenlandimi piginneqataassutaasa akiinik aallarnisaasumik oqaloqatigiinnernut ilaavunga. Piffissamilu tassani SAS-ip kissaatigisaa maanna naatsorsorneqartumit appasinnerujussuusoq takusinnaavarput. Piffissamilu tassani SAS-imi taamani piumasaata akilerneqarnissaa taperserneqanngilaq, piviusorsiunngitsutut nalilerneqarnera pissutaalluni, Svend Hardenberg saqqummiivoq.
Air Greenland taamanernit kiffartuussinermut isumaqatigiissutinik aamma immikkut ittunik annaasaqarnikuummat, taakkulu angusap qanoq innissaraluanut ajornerulersitsinikuummata, maanna akigitinneqartoq paasisinnaanngilaa.
Qaffatsitsisortaqanngitsoq
- Tassanilu akimik qaffatsitsisoqanngilaq, Svend Hardenberg naqissusiivoq.
- Aap, Air Greenland ataavartumik sinneqartoorujussuartarpoq, kisianni ajoraluartumik kisermaassisuunerup kinguneranik angusaavoq, uangalu isinnit angalanermut akiliut annertuallaarpoq. Ingerlatseqatigiiffik alla timmisartuussilerpat susoqassava, piviusorsiortumillu akip ullumikkut ilisimasatta affaannaanik akiliisitsilluni atlantiku qulaallugu timmisartuussisalissappat? ”Annaaneqartut” tigoqqinniarlugit Air Greenlandip nunatsinni timmisartuussisarnerminik akitsuineranik tamanna kinguneqassaaq, naalakkersuisoqarfimmi pisortaasimasoq taama oqarpoq, imatullu oqarluni naggasiivoq:
- Isumaqarpunga tamanna paasissaanngitsoq…