Skip to main content

Ernera bøjletaassaaq: 40.000 koruuninik akiligassaqassaaq

Tina Abildgaardip ernini Nuummi kigutilerivimmi namminersortumi bøjletaartissaguniuk, taava katillugit 40.000 koruuninik akiliissaaq.

Tina Abildgaard 35-inik ukioqarpoq, ilinniartuulluni Nuummilu inissiani akisunerit ilaanni najugaqarluni. Pingasunik meeraqaraluarluni qaammammullu aalajangersimasunik akiligassaqartaraluarluni, isumaginninnermi siunnersortitut ilinnialissalluni aalajangersimavoq, nalunagu taama aalajangerneq aningaasaqarnikkut allannguingaatsiartussaasoq.

Maannali nammineerluni aappanilu ikinnerpaamik 40.000 koruuninik akiligassaqaleriasaarput, ernerammi bøjletaartariaqavippoq. Akilersugassaq taanna namminneq akilersussallugu naatsorsuutigisimanngikkaluarpaat.

- Bøjleqartinneqarluni suliarineqarnissaa nammineerluta akilertussaallugu paasigatsigu, tassa soorlu naakkut tillutsiinnarluni. Pisortani ikiorneqarnissaa naatsorsuutigisimagaluarparput, Nunatsinnimi meeqqat kigutileritittarnerat akeqanngimmat. Taamaattussaasimanngilarli, anaanaq Sermitsiaq.AG-mut oqarpoq.

Kigutit inissisimanerat aarlerinartoq

Ernera qulingiluanik ukioqarluni pisortat kigutileriviani 2016-imi pisarnertut misissorneqarpoq. Kigutigissaasup kigutilerisumut bøjlelerisartumut piaartumik innersuuppaa, kigutilerisup nalilissammagu bøjletaassanersoq. Ernerata kigutai kiisiniarnermi equgapput, alliit ilummoornerullutik, tamuaneranullu tamanna sunniisarpoq.

- Susoqanngilaq. Kigutileriffimmi kigutigissaasumut ukioq manna aallartissimalersoq misissorneqaqqippoq, tassanilu nalilerneqarpoq piaartumik bøjlelerisumit misissorneqartariaqartoq. Kigutaasa equnganeri aarlerinartoqarput, Tina Abildgaard oqaluttuarpoq.

LÆS OGSÅ: Pisortat kigutileriffiini bøjlelersuiunnaarput

Qaammatini marlunni utaqqigaluariarluni, Tina Abildgaard nammineerluni kigutilerivimmut apriilimi maajimiluunniit saaffiginneqqippoq, paasiumallugu ernini qaqugu kigutilerisumit bøjlelerisumit misissorneqassanersoq. Kingusinaareersimavorli.

- Paasitinneqarpugut pisortat kigutileriffiini bøjlet atorlugit kigutit narlorsarneqartarnerat neqeroorutaajunnaarsimasoq. Taama aalajangernermut tunngavilersuutigineqarpoq peqqinnissaqarfiup iluani aaqqissuusseqqittoqassasoq, taamaammallu ilisimaneqanngitsoq bøjlet atorlugit kigutinik narlorsaasarneq pisortani neqeroorutaaginnassanersoq, Tina Abildgaard oqarpoq.

Sermitsiaq.AG-p Peqqissutsimut Naalakkersuisoqarfik saaffigaa pisortani bøjlet atorlugit kigutit narlorsarneqartarnerat peqqinnissaqarfimmi aaqqissuusseqqinnermi allanngortinneqassanersoq uppernarsaqqullugu. Naalakkersuisoqarfimmi immikkoortortami pisortap Michael Würtzip, kigutit inissisimanerisa aaqqissuunnissaannut neqeroorut peqqinnissaqarfimmi aaqqissuusseqqinnermi allanngortinneqassanersoq pillugu itinerusumik oqaaseqarsinnaanngilaq.

- Kigutit narlorsarneqartarnerannut tunngatillugu aggustip naalernerani politikkikkut aalajangiisoqassaaq, taassuma tungaanut naalakkersuisoqarfiup oqaatigisinnaanngilaa kikkut bøjletaarnissaannut misissuisarneq sukkut qanorlu allanngortinneqarsimanersoq, peqqissutsimut naalakkersuisoqarfimmi immikkoortortaqarfimmi pisortaq, Michael Würtz nassuiaavoq.

Bøjlet pillugit suliaq

Sermitsiaq.AG-p sapaatip akunnerata siuliani oqaluttuarisinnaavaa pisortat kigutileriviini kigutit narlorsarniarlugit bøjlelersuisarnerit unitsinneqarsimasut. Allannguineq utaqqiisaasumik atuunnersoq unitsivinneqarnersorluunniit peqqinnissaqarfimmi qullersanit imaluunniit Peqqissutsimut Naalakkersuisoqarfimmit oqaatigineqanngilaq.

LÆS OGSÅ: Martha: Nedskæringer er ikke godkendt

Taamaattoq Peqqissutsimut Naalakkersuisoq, Martha Abelsen (S) tusagassiutinut nalunaaruteqarpoq bøjlelersuisarnermut misissuisarnerit maleruagassaat nutaanngorsimasut, bøjlelersuisarnerilli unitsinneqarsimanatik.

- Tamanna mamianarpoq, ilami Kalaallit Nunaanni peqqinnissaqarfimmi meeqqat sullinneqarnerat akeqanngikkaluarpoq, Tina Abildgaard oqarpoq.

Qanoq pisoqassagaluarpalluunniit ernertik bøjleqalissasoq, aappanilu aalajangiusimapput. Qanorluunniit akeqaraluarpat.

- Bøjlet akilersulerutsigit inuunerput qanoq ikkumaarnersoq takorlooruminaatseqaara. Ullumikkut akiligassatsinnut inissaqartitseqqinnaarpugut, Tina Abildgaard oqarpoq, taassuma nassuerutigaa pisumi qanoq ilioriusissaarunneq misiginartoq.

Læs hele sagen:

  1. Den offentlige tandpleje dropper bøjler
  2. Pisortat kigutileriffiini bøjlelersuiunnaarput
  3. Ændring i tandplejen er i strid med bekendtgørelse
  4. Kigutigissaanermi allannguisoqarnera nalunaarummik malinninngilaq
  5. Meeqqat kigutaasa peqqissusaannut tunngatillugu sipaarasi
  6. Spar ikke på tandsundheden
  7. Tandbøjle-sag er under al kritik
  8. Bøjlet pillugit suliaq isornarluinnarpoq
  9. Nedskæringer er ikke godkendt
  10. Chokregning på 40.000 kr.
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER