Pisortat kigutileriffiini bøjlelersuiunnaarput

Peqqinnissaqarfimmi aqutsisoqarfiup aalajangerpaa, pisortat kigutileriffiini meeqqat kigutaat narlorsaaserlugit bøjlelerneqartarunnaassasut.

Peqqinnissaqarfimmi aqutsisut Sermitsiaq.AG-mut ilisimatitsipput.

Kigutinut isumaginnittoqarfiit suliat kingulliit maanna inaarsarpaat, meeqqallu equngasunik kigutillit maanna bøjlelerneqartarunnaareerput.

Tamanna isumaqarpoq meeqqat kigutaat narlorsaaserlugit bøjlelerneqassappata, tamanna kigutilerivinni namminersortuni pissaaq. Tamannalu angajoqqaanut akisoorujussuusinnaavoq.

Akit assigiinngillat

Kigutileriffimmi namminersortumi, Tandlæge Niels Nygaard Aps-imi Nuummiittumi, bøjlelerisoq Karen Haarbo-Nygaard Sermitsiaq.AG-mut ilisimatitsivoq kigutit inissisimanerisa assigiinngiiaarsinnaanerat pissutigalugu akit assigiinngitsorujussuusinnaasut. Taassuma erseqqissaatigaa akimik tunngaviusumik taasisinnaanani, kigusiartut kigutaat immikkut misissorneqartarmata.

Kigutilli narlorsarniarlugit bøjleliinerit minnerpaamik 15.000 koruuneqarsinnaasarput, kigutillu equngavallaarpata akip taaneqartup marloriaataa sinnerlugu akeqarsinnaasarlutik.

- Siusissukkut bøjletaaraanni, suliaritinneq sivikinnerusinnaavoq taamaasillunilu akikinnerulluni. Kigutilli piusussat narlorsarneri sivisunerusinnaapput akisunerullutillu, Karen Haarbo-Nygaard oqarpoq.

Taassuma ilisimatitsissutigaa meeqqat bøjletaarnissaat pillugit angajoqqaat saaffiginnittut amerlisimasut.

Kigutilerisussaaleqineq

Meeqqat kigutaasa bøjlelernissaat kigutinik isumaginninnermi akeqanngitsumik neqeroorutigineqarunnaarnerannut pissutaavoq nunami tamarmi kigutilerivinni kigutilerisut, kigutilerisut immikkut ilinniarsimasut kigutigissaasullu allat amigaatigineqarnerat.

Peqqinnissaqarfimmilu aqutsisut isumaqarput meeqqat bøjlelernissaannut neqeroorneq atorfeqartitsinermi imminut illersorsinnaajunnaavissimasoq.

- Kalaallit Nunaanni kigutinut isumaginninnermi taama periarfissaqanngilagut, Peqqinnissaqarfimmi aqutsisut nalunaaruteqarput.

Kigutit equngasut kigutinut peqqinnanngillat

Kigutit narlorsartinniarlugit bøjletaanngikkaanni kigutit nungullariartulersinnaapput, kigutit sorlai sequmissinnaapput tamuasarnerlu eqqorneqarsinnaalluni. Taama pisoqarnerani kigutit ajornerulersinnaapput.

- Kigutit equnganeranni kigutit sorlaat nungullalerpata, kingunerisinnaavaa kigutit katangalersut, Karen Haarbo-Nygaard ilisimatitsivoq.

- Soorunami kigutit peqqissusaat eqqorneqassaaq, aammali inuunerup pitsaassusaa pinngitsoorani pitsaanngitsumik sunnerneqassalluni, Karen Haarbo-Nygaard oqarpoq.