hashimut akiuineq
Enoksen aalajangiusimasoq - akuersissutinut sioorasaarut attakkaa
Hans Enoksenip hashimik anngiortumik eqqussuinerup akiorneqarnissaa pillugu oqariartuutini akerleriissutaasut aalajangiusimaannarpai, inuttallu hashimik eqqussisutut paasisaatillugit kilisaataatillit aningaasatigut sioorasaarpai.
Sermitsiaq.AG-p sapaatip akunnerani kingullermi allaasereriigaatut, aalisarnermut naalakkersuisup Hans Enoksenip (PN), inuttat kilisaammi ikiaroornartumik eqqussisutut paasineqartillugu kilisaataatillit akuersissutiminnik pisassiissutinilluunniit annaasaqaratarsinnaasut mianersoqqussutigaa.
Kilisaammi Polar Nanormi hashimik 20 kiilumik nassaartoqarnerata kingorna Enoksen taama oqariartuuteqarpoq.
Hans Enoksen oqariartuuteqarnini pillugu Sulisitsisunit aamma Demokraatineersumit Michael Rosingimit isornartorsiorneqarpoq.
Oqariartuutini aalajangiusimagai
Hans Enoksenip oqariartuutini aalajangiusimaannarlugit Sermitsiaq.AG-mut oqarpoq. Kilisaatit aanngajaarniutinik Kalaallit Nunaannut assartuinermi atorneqartillugit, siunissami akuersissutinut aamma pisassiissutinut inatsisit sukaterneqartariaqartut isumaqarpoq.
- Suliffeqarfiit kilisaataatillit akuersissummik pisassiissutinilluunniit arsaarneqarlutik pillagaasinnaasariaqartut isumaqarluinnarpunga. Maannakkuminngaanniit hashi akiorniarlugu kikkut tamarmik peqataasariaqarput, inatsisillu malinngikkaanni kinguneqartitsissutaasinnaasariaqarpoq, Hans Enoksen erseqqissaavoq.
Inuit imigassartorsimallutik biilertut ingerlatsisinnaanermut allagartartik annaasinnaanerannut taanna innersuussuteqarpoq.
- Kilisaammik piginnittunut tamanna aamma atuuttariaqarpoq. Tamanna akuersissutaannik arsaarinninnikkut pissaaq. Tassami akisussaaffimmik tiguseqataasariaqarput, taanna oqarpoq.
Atuaruk: Sulisitsisut: Enoksenip siorasaarinera akuerineqarsinnaanngilaq
Iliuuseqarneq sukannernerusoq
Inatsisit sukaterneqartariaqartut Hans Enoksenip pisariaqartinnerarpaa, aanngajaarniutit Kalaallit Nunaannik ajoqusiisimasut isumaqarami.
- Tassami meeqqat allaat ikiaroortartut tusartarparput. Tamanna unitsinneqartariaqarpoq. Kilisaataateqarfiit namminneq malittarisassaqarput, kisiani maanna takusatsitut malittarisassat pitsaanngillat. Taamaammat inatsisit sukaterneqartariaqarput.
- Kilisaatit naalagaasa inuttat hashimik eqqussuinersut misissueqataaffigisariaqaraluarpaat. Akitsuuserisut aamma amerlanerusariaqarput, taamaalilluni hashimik eqqussuinermut iliuuseqarneq sukannernerulissammat, Hans Enoksen oqarpoq.
Atuaruk: Michael Rosing: Sulliviit pillarneqassanngillat