hashimik eqqussuineq

Michael Rosing: Sulliviit pillarneqassanngillat

Aalisarnermut naalakkersuisup Hans Enoksenip kilisaataateqarfinnut sioorasaarutaa akuersaarneqarsinnaanngilaq, Demokraatineersoq Michael Rosing oqarpoq

Aalisarnermut naalakkersuisup Hans Enoksenip kilisaataateqarfinnut sioorasaarutaa akuersaarneqarsinnaanngilaq, Demokraatineersoq Michael Rosing oqarpoq

Kilisaammi Polar Nanormi hashimik 20 kiilumik nassaartoqarnerata aalisarnermut piniarnermullu naalakkersuisoq, Hans Enoksen (PN), kilisaatini inuttat aanngajaarniutinik anngiortumik eqqussiniartunut paasineqaraangata, tallimanngornermi kilisiaatinik piginnittut aningaasaqarnikkut sioorasaaritippaa.

Akuersissutit pisassiissutillu agguaanneqarnerinut inatsisisit sukaterneqarnissaat isumaliutiginiarlugu, Hans Enoksenip tusagassiuutinut nalunaarummi ilisimatitsissutigaa.

Atuaruk: Kilisaatit ikiaroornartulerisunik inuttallit akuersissutaarneqartalernissaannik Enoksen sioorasaarivoq

Sulisitsisut isornartorsiuisut
Hans Enoksenip sioorasaarutai sulisitsisuni pisortap Brian Buus Pedersenip 'akuersaarneqarsinnaanngitsutut' oqaatigai.

- Sulisitsisut tungaannit akuerineqarsinnaanngitsutut isumaqarfigaarput, suliffeqarfik napangiutigisaminik qunusaarneqassappat aallavigalugu sulisuusup nammineq inatsisaatsumik ingerlatsinera, taamallu suliffeqarfik unioqutitsinertaqanngitsumik ingerlatsisoq pisumilu pisooqataanngilluinnartoq, pisumut pisooqataasutut akuliullugu, Sulisitsisut pisortaat Brian Buus Pedersen, arfininngornermi taama ilaatigut oqarpoq.

Isornartorsiuineq nutaaq
Brian Buus Pedersen maanna Inatsisartunut ilaasortamit Michael Rosingimit (D) taperserneqarpoq.

- Naak pingaarnertut anguniagaq paasinaraluartoq, Kalaallit Nunaanni aanngajaarniutinik atornerluinerujussuup ajornartorsiuterpassuarnik pilersitsisarnera eqqarsaatigalugu, isumaqarpunga akuerineqarsinnaanngilluinnartoq taamatut siorasaaruteqarneq, Michael Rosing tusagassiuutinut nalunaarummi allappoq.

Naalagaaffinni inatsisit tunngavigalugit naalakkersorneqartuni allat piliaannut akisussaatitsisoqarneq ajortoq, taassuma erseqqissaatigaa.

Atuaruk: Sulisitsisut: Enoksenip siorasaarinera akuerineqarsinnaanngilaq

Sulliviit pillarnagit
- Allamik naamik. Sullivimmi sulisoq sunngiffimmini pinerluttuliorpat sullivik pillarneqarsinnaanngilaq nammineq pinerlunnissamut kajumissaarisimanngikkuni imaluunniit isiginngitsuusaarsimaguni. Suliami pineqartumi taamaattoqanngilaq, Michael Rosing oqarpoq.

- Naapertuilluarnermik misigissuseqarnerma narrunarsarneqarata saniatigut eqqarsarnarluinnartippara Naalakkersuisut taamatut nunami nunallu ungataaniittunut aningaasaliisartunut oqariartuutigineqarmat, Naalakkersuisut tatigineqarsinnaanngitsut pissutigalugu assersuutigalugu aatsitassarsiorfinnut akuersissutinut piumasaqaatit allanngortinneqarsinnaammata tusatsiakkat tunngavigalugit tamanna politikkikkut ajornannginnerummat, Michael Rosing oqarpoq.

Powered by Labrador CMS