Ikiaroornartumik eqqusseriarneq
Sulisitsisut: Enoksenip siorasaarinera akuerineqarsinnaanngilaq
Kilisaammi inuttap ikiaroornartumik eqqusseriarluni paasisaappat kilisaat aalisarsinnaanermut akuersissutaanik pisassaanilluunniit arsaarinnittalernissaq akuerineqarsinnaanngitsoq Sulisitsisut pisortaat isumaqarpoq.
Polar Nanumi ikiaroornartumik 20 kg-lumik nassaarnerup kingorna aalisarnermut piniarnermullu naalakkersuisoq Hans Enoksen kilisaatinik piginnittunut pisoqartillugu aningaasatigut kinguneqartinneqartalissasut sioorasaarivoq.
Aalisarsinnaanermut akuersissutinik pisassanillu tunniussisarnerup sukaterissallutik siunniussaqarput. Aalisarnermut piniarnermullu naalakkersuisoq Hans Enoksen tusagassiuutinut nalunaarummi taama ilaatigut allaaserisaqarpoq.
Sulisitsisut pisortaat Brian Buus Pedersen taama nalunaaruteqartoqarnera tupigusuutigaa.
- Inuttaasup nammineq inatsisaatsumik ingerlatsinera aallavigalugu suliffeqarfik napaniutigisaminik qunusaarneqassappat, taamatullu suliffeqarfik unioqutitsinertaqanngitsumik ingerlatsisoq pisumilu pisooqataanngilluinnartoq aningaasarsiutaannik arsaarnissaanut sioorasaarneqassappat sulisitsisunit isumaqatiginngilluinnarparput, Sulisitsisuni pisortaq Brian Buus Pedersen oqarpoq.
- Inatsisit tunngaviinik pissutsinullu sanilliussineq eqarfigigaanni politikkerip qisuariarnera eqqumiiginarpoq. Naalakkersuit suliffeqarfiit aamma allat taama pisalissuai? RAL assartugaani ikiaroornartumik nassaartoqarpat suliffeqarfik angallassisinnaajunnaassua? Air Greenland angallasseqqusaajunnaassua? Tele-Post allakkanik poortukkanillu suliaqaqqusaajunnaassua?, pisortaq apeqquteqaateqarpoq.
Oqartussat ilisaatini piginnittut suleriusaannik sukateriffigiissagaat kaammattuutigaa.
Sulisitsisut: Suleqatigiinneq nukittorsarli
- Suleqatigiinnermi suliassat ilagaat kilisaatit umiarsualivinniitillugit amutsivinniitillugilluunniit misissuisoqartarnissaa. Suleqatigiinnerup imaasa ilagaattaaq kilisaatit piginnittui kissaateqarsimatillugit oqartussanit nakkutiginnittoqarlunilu misissueqqissaartoqassasoq. Ikiaroornartunik eqqusseriartoqartarnerup oqartussanit akiorneqarniarnera tapersersorneqarluni.
Misissuisoqarnerulerpat pitsaanerulissaaq, misissuinerimmi kilisaatinik piginnittut inuttalluunniit pisuutitaarusunngitsut taperserneqalissapput, Sulisitsisut pisortaat allappoq.
Brian Buus Pedersenip kilisaatini aanngajaarniutinik atuisoqartarneranik akiuiniarluni suliniuteqartoq, inuttammi imigassamik ikiaroornartumilluunniit atuisimasut imminnut inuttaaqatiminulli ulorianartorsiutitsisarmata ilassutigaa.
Hans Enoksenilu toqqaannartumik kaammattorpaa suleqatigiinnerup nukittorsarneqarnissaa ukkatigeqqullugu.