Polar Nanoq
Kilisaatit ikiaroornartulerisunik inuttallit akuersissutaarneqartalernissaannik Enoksen sioorasaarivoq
Islandimi politiit ikiaroornartumik 20 kilomik Polar Nanumi nassaarput. Polar Seafoodip KNR-imut paasissutissiissutigaa. Taamaattoqarnerata aalisarnermut piniarnermullu naalakkersuisup umiarsuaatileqatigiiffiit ikiaroornartumik anngiorluni eqqussuisoqannginnissaanut sukatereqqullugit. kaammattorpai.
Naqqitaq: Ikiaroornartup annertussusaa allaaserisami siullermi kukkuneqarpoq
Islandimi politiit ikiaroornartumik 20 kilomik Polar Nanumi nassaarput. Islandip politiivi taama paasissutissiipput.
Inuttaq ataaseq ikiaroornartumik anngiorluni eqqusseriaraluartutut pasineqarluni tigusarineqarpoq.
Akuersissummik arsaarinissaq sioorasaarutigaa
Taama pisoqareertorlu aalisarnermut piniarnermullu naalakkersuisoq Hans Enoksen (S) umiarsuaatileqatigiiffinnut mianersoqqusivoq. Pisut eqqumaffigineruleqquai taamaanngippat akuersissummik arsaagaanissassut tusagassiuutinut nalunaarummi oqariartuutigalugu.
- Nunatsinni umiarsuaatillit kilisaataatillu kaammattorusuppakka inuttaminnut erseqqilluinnartunik malittarisassiuuseqqullugit, piumasarineqassalluni nunatsinnut umiarsuartigut ikiaroornartunik eqqussineq inerteqqutaalluinnarmat, Hans Enoksen (PN) oqarpoq.
Kilisaatinilu ikiaroornartumik nassaartoqaqqissagaluarpat sakkortuumik kinguneqartitsinissani naqissuserpaa.
- Kilisaatit anngiortumik ikiaroornartunik unioqqutitsillutik eqqusseriarnermi atorneqartassappata, Naalakkersuisut aalisarsinnaanermut akuersissutinik pisassanillu tunniussisarnerup sukateriffigineqarnissaanik sukaterissallutik siunniussaqarput.
14 millionit koruuninik naleqarput
Ikiaroornartoq Polar Nanumi nassaarineqartoq Birna Bjránsdóttir periarfeerunneqarnerani misissuinermi piaarinaatsoornerinnarmik nanineqarpoq.
Ikiaroornartorlu arsaarinnissutigineqartoq 20 kilomik oqimaassusilik Nunatsinni millionerpaalunnik naleqarpoq. Akit nikerarput Naalakkersuisulli nuna tamakkerlugu 2016-imi periusissiaat naapertorlugu hashi gramimik ataatsimik oqimaassuseqartoq 700 1.000 koruunillu akornanni naleqarpoq. Ikiaroornartorlu Polar Nanumi arsaarinnissutigineqartoq naalakkersuisut paasissutisaataat malillugu 14 millionit koruuninik naleqarluni.
Ikiaroornartulli nalinga illoqarfinni mikinerusuni annertuneruvoq.