Dennisip ilinniarnissani suli ilungersuutigaa
Dennis Mølleri ilinniarfimminit ilinniarnermut akiliinnginneq pissutigalugu anisitaavoq. Taassuma eqqartuussissuserisunilu Naalakkersuisut ilinniarneranut akiliinissaat suli ilungersuutigaat.
Dennis Mølleri filmiliortarnermi ilinniarusuppoq. Kalaallit filmiliortarnerat eqqarsaatigalugu nunanik allanik suleqateqarneq nukittorsarusullugu Norge toqqarpaa.
Ukiuni arlalinni suliassaqarfimmi sulereerpoq, arlalitsigullu Kalaallit Nunaanni filmiliortartut sinnerlugit nunarsuatsinni peqataaffeqartarpoq.
Kingullermik Tromsø International Film Festival Norgemi, Finlandimi Skábmagovat, Berlinimi Berlinale aamma International Human Documentary Film Festival Oslomi Kalaallit Nunaat sinnerlugu peqataavoq.
Angalanerit amerlanersaat Dennis Møllerip peqataaffigisai film.gl sinnerlugu angalanerupput.
Eqqartuussissuserisumit ikiorneqarnissamik qinnuiginnittoq
Kisianni Norgemi ilinniarfik toqqagaa ilinniakkani nunatta karsiata akilersinnaasaanut ilaanngilaq.
Dennis Møllerilli ilinniarnermi aallartinnera sioqqullugu Københavnimi Kalaallit Illuutaannit allatut nalunaarfigineqarpoq, tamatumalu kingunerisaanik ilinniarfimmut akiliinnginneq pissutigalugu anisitaavoq.
- Pisoq pisariaqanngilaq aamma qasunarpoq, Dennis Møller Sermitsiaq.AG-mut oqarpoq.
Taassuma Norgemi ilinniarnissamik kissaateqarnera, nammineq oqarnera naapertorlugu naalakkersuisoqarfimmit paasineqarsimanngilaq.
- Taakku oqarput ”Danmarkimi ilinniarneq akeqanngilaq”, tamannalu soorunami ilumoorpoq, kisianni Danmarkimut aallartinneqaannartarniarutta pisariaqartitsiniaruttalu, ilinniartoqatiniillu nikanartumik ”aasit kalaaleq alla” isigineqarniarutta, nunatut ineriartornavianngilagut.
Namminersorlutik Oqartussanit akiliinissamut itigartitsineq inatsimmi tunngavissaqanngitsoq, Dennis Møller aamma eqqartuussissuserisoq Andreas Dannevang isumaqarput.
Norgemi ilinniarfimmut itigartitsineq ilinniakkap ilinniaqqiffiunnginneranik tunngavilersorneqarpoq – aalajangiineq taanna Dennis Møllerip eqqartuussissuserisuata pissarsiarisimavaa.
13. marts naalakkersuisoqarfiup tamanna aalajangiuppaa, aammalu aalajangiineq maalaarutigineqarsinnaanngitsoq maluginiaqqullugu.
Nassuiaatit danskisut norskisullu assigiinngitsut
Eqqartuussissuserisup Andreas Dannevangip naalakkersuisoqarfimmut mailikkut 2. marts maluginiaqquaa, aalajangiineq danskit norskillu inuussutissarsiornermut ingerlariaqqiffiusumillu ilinniarfiit nassuiaataannik paatsoornermik tunngaveqartoq.
Noroff-imi ukiuni marlunni ilinniakkap, Dennis Møllerip ilinniarfigisaa, Norgemi qaffasissumik ilinniagaasoq, (Norgemi ilinniarnermut inatsimmut innersuussilluni) taanna tunngavilersuivoq, tassa assersuutigalugu Danmarkimi Akademimi ilinniaqqiffiusoq imaluunniit Inuussutissarsiornikkut akademitut ilinniarfittut ittoq.
Naalakkersuisoqarfiup eqqartuussissuserisullu Andreas Dannevangip akornanni attaveqatigiinneq takisooq, Sermitsiaq.AG-p tigummisaa naapertorlugu, Namminersorlutik Oqartussat eqqartuussissuserisuata ilinniagaq Danmarkimi inuussutissarsiornermik ilinniagaanerarpaa, Danmarkimilu ilinniaqqiffiunngitsutut nalilerrlugu.
Namminersorlutik Oqartussat misissuinissamut pisussaaffeqartut isumaqartut
Ilinniarfeqarfiup attaveqatigineqarnerinut innersuussilluni danskisut norskisullu nassuiaatini paarlaassisoqarsimanera maluginiaqqullugu, Andreas Dannevang naalakkersuisoqarfimmut allappoq.
- Norgemi ingerlariaqqiffiusumik ilinniarfik Danmarkimi ilinniarnertuunngorniarfimmut sanilliunneqartarpoq. Aammattaaq Urdalip (Noroff-imi sulisup, aaqq.) Norgemi paasinninneq naapertorlugu ingerlariaqqiffiusumik ilinniagaannginnerarmagu ilumoorpoq.
Naalakkersuisoqarfik suliami misissuinissamut pisussaaffeqartoq, Dennis Møllerip eqqartuussissuserisuata aamma maluginiaqquaa, aammalu soorunami Danmarkimi Norgemilu ilinniarfiit qaffasissusaannik taaguutit assigiinnginnerat oqaatigalugu, tassami nunat assigiinngitsuummata.