Naalakkersuisoqarfiup Dennis Mølleri Oslomi ikiorsinnaanngilaa
Københavnimi Kalaallit Illuutaata kalaallip ilinniartup kukkusumik siunnersorneqarnera Namminersorlutik Oqartussat akisussaaffiginngilaat, taanna maanna Norgemi ilinniartuujunnaarlunilu isertitaaruppoq. Ilinniartitaanermut naalakkersuisoqarfik Sermitsiaq.AG-mut ilisimatitsivoq.
Dennis Mølleri ilinniarfimminit anisitaavoq, ilinniarnernut akiliut nammineq akilersinnaannginnera pissutigalugu, Københavnimi Kalaallit Illuutaannit siunnersorneqarnini malillugu Namminersorlutik Oqartussat akiliussisussaanerannik isumaqaraluarami.
Ilinniartunut siunnersortilli kukkunera Naalakkersuisut iliuuseqarfigisinnaanngilaat. Ilinniartitaanermut, Kultureqarnermut, Timersornermut Ilageeqarnermut Naalakkersuisoqarfik, Sermitsiaq.AG-mut akissummi taama ilisimatitsivoq.
Naalakkersuisoqarfik Dennis Mølleri pillugu suliamut oqaaseqarsinnaanngilaq, kisianni immikkut akuersissuteqartoqarnissaanik aalajangiisartut ilinniakkanut nalinginnaasumik ilinniagaqarnersiuteqarfiunngitsunut tapiissuteqarnissamut aalajangiisartut ilisimatitsissutigaat.
Siunnersortip aalajangiineq paatsooraa
Ilinniagaq taamaattoq Dennis Møllerip Oslomi ilinniarfigissallugu aalajangerpaa. Taamaammallu ilinniakkamut akiliutissat Namminersorlutik Oqartussanit akilerneqarnissaanut qinnuteqaateqarpoq. Ilinniarnerup aallartinnginnerani Dennis Mølleri ilinniartutut siunnersortiminit ilisimatinneqarpoq, Naalakkersuisut akiliutip 75 procentiata akilerneqarnissaa akuerisimagaa, sinneralu taarsigassarsiarineqarsinnaasoq.
Kisianni aalajangiineq akerlerluinnaanik inerneqarpoq. Ilinniakkap immikkuullarissuunera pissutigalugu Naalakkersuisut akiliisinnaanngillat, illuanilli ilinniagaqarnersiutinik tapiissutinillu neqeroorsinnaapput, tassa Dennis Møllerip Norgemi ilinniarnermini aningaasat inuussutissai.
Taakku aalajangiinerat Dennis Møllerimut aamma Københavnimi Kalaallit Illuutaannut nassiunneqarput.
Kalaallit Illuutaanut kukkussutaatinneqartoq
Kalaallit Illuutaanni sulisut aningaasaliissuteqarnermi allakkiamik taaneqartartumi, Dennis Møllerip qanoq tapisiaqarnissaanik kukkussuteqarsimapput.
- Aningaasaliissuteqarnermi allakkiaq taamaattoq ingerlatsinermik malittarisassatigut aalajangerneqareersutut iluseqartarpoq, naalakkersuisoqarfik taama akissuteqarpoq.
Kukkusoqarnerata kingorna Dennis Mølleri maanna ilinniarfimminit anisitaaneranik kinguneqarpoq, ilinniarnermini semesterimut ataatsimut 40.000 koruuninik akiliutissaqannginnami. Kisianni tamanna iliuuseqarfigineqarsinnaanngilaq, naalakkersuisoqarfik Sermitsiaq.AG-mut akissuteqarnermini taama allappoq.
- Malittarisassat allaffissornermi kukkussutigineqarneranni, assersuutigalugu aningaasaliissuteqarnermut allakkiami, kukkussutaasoq iluarsineqassaaq, naalakkersuisoqarfiullu suliami pineqartumi pisoq aqutsisunut oqaatigissavaa.
Aalajangiineq eqqunngitsuusoq isumaqartoq
Kisianni tamanna Dennis Møllerimut iluaqutaanngilaq. Suliami eqqartuussissuserisumik suliaqartitsivoq, taassumalu Namminersorlutik Oqartussat sapaatip akunnerini arlalinni attaveqarfigai, tamannalu pisumut allannguinngilaq.
Dennis Mølleri isertitaqanngilaq, ilinniagaqarnermusianilu januaarimeersut utertissagai piumaffigineqarpoq, Oslomilu ineqarnermut suli akiliuteqarlunilu aningaasartuuteqarpoq. Taanna Norgemi eqqartuussissuserisuni peqatigalugu Namminersorlutik Oqartussat aalajangernerat eqqunngitsumik tunngaveqartoq isumaqarput, allanngortinnissaalu suli sulissutigaat.
Københavnimi Kalaallit Illuutaanni pisortaq Leise Johnsen suliaq aamma ilinniartumut eqqunngitsumik siunnersuineq pillugit Sermitsiaq.AG-mut oqaaseqarusunngilaq.