Kalaallit Illuannit kukkusumik siunnersuineq Dennisip ilinniarunnaarneranik kinguneqarpoq

- Norgemi filmiliornermik ilinniarfik Danmarkimut taarsiullugu toqqarpara, Danmarkimi kalaaliulluni immikkut pineqarneq annertooq misigigakku. Tamatuma saniatigut nunami allami ilinniarniarlunga aalajangerpunga, Kalaallit Nunaata nunanik allanik filmiliornerup tungaatigut suleqateqarneq nukittorsarusukkakku.

28-nik ukiulik Dennis Møller, kalaallinut ilinniartunut allanut assingusumik pisoqarnissaanik oqaluttuarnermigut pinaveersaartitserusuttoq taama oqaluttuarpoq.

Norgemi ilinniarnissamik aalajangerneq Dennis Møllerimut akisuvoq.

Ilinniartunut siunnersortimit paasissutissat kukkusut

Taassuma Kalaallit Illuanni Københavnimi ilinniarnermut siunnersortaa maajimi 2022-mi allappoq, Dennis Møllerip ilinniarnermut akiliutip akilerneqarnissaa Naalakkersuisunit akuerineqarsimasoq.

- Ilinniarnerpit 75 procentiata akilerneqarnissaanut pisinnaatitaaffeqarputit, kingullernullu 25 procentinut taarsigassarsinissamut aamma periarfissaqarputit. Universitetimut akiligassap 75 procentiisa nalinginut allagartaa uannut toqqaannartumik nassiuteqqussavat, maanngaanniit akilissavakka (...) Ilinniarninni ineqarnermut akiliisarnissat nammineq isumagissavat.

- Siunnersorteraakkit, attaveqarfiginninnissannullu tikilluaqqusaajuaannarputit.

Sermitsiaq.AG-p Naalakkersuisunit aalajangiineq pissarsiaraat, tassani ilinniartumut siunnersortip allagaata akerlianik, ilinniarnermut akiliutit akilerneqarsinnaannginneranik allaqqasoqarpoq, ilinniagaq ilinniagaqarnersiaqarfiunissamut akuerineqarsimanngimmat.

Nassuerlunilu ajuusaartoq

Kalaallit Illuutaannit siunnersorti pisoq taassuma paatsoorneranik siunnersuineranillu pissuteqartoq nassuerpoq. Dennisimullu mailimi allappoq:

- Dennis, aajuusaarluinnarpunga, uanga tamanna kukkussutigaara, ajuusaarutigeqaaralu. Immikkut akuersissuteqartoqarnissaanik aalajangiinermi 29. marts 2022-mi allaqqasoq malillugu, qupperneq 3-mi ilinniarnermut akiliunneqarsinnaannginnerit atuarneqarsinnaavoq.

Dennis ajunngitsumik isumaqarluni Norgemut aallarpoq, ilinniagarlu takorluukkani siorna aasaanerani atuanngiffiup kingorna aallartippaa.

Maanna ilinniarfimmit anisitaavoq, Namminersorlutik Oqartussat aalajangiinermi allassimasoq malillugu, ilinniarfimmi semesterimi ataatsimi ilinniarneq 40.000 koruuninik akeqartoq akilersinnaanngimmassuk.

Ikiuisussaqanngitsoq

Dennisip angerlamut billetimik akiliunneqarsinnaasoq, aamma januaarimi ilinniagaqarnermusiani ilinniarunnaarsimagami utertissagai nalunaarfigineqarpoq.

Københavnimi Kalaallit Illuutaanni pisortaq, Leise Johnsen, suliaq aamma kalaallinut ilinniartunut eqqortumik siunnersuisarnermut akisussaaffik pillugit apersorneqarumanngilaq. Kalaallit Illuutaat ilinniartunik namminneq siunnersuinerminni kukkunerit pissutigalugit ajornartorsiortunik ikiuinissamut akisussaaffeqarnersut Sermitsiaq.AG-p apeqqutigerusukkaluarpaa.

Dennis Møllerip eqqartuussissuserisumit ikiorneqarluni Norgemi ilinniarnini nanginniarlugu suli ilungersuutigaa.