naalakkersuisunngortoq
D: Finn Karlsen tatiginngilarput
Finn Karlsen Siumumeersoq Naalakkersuisuni ilaasortassatut siunnersuutigineqalerpat Demokraatit Inatsisartuni akerliullutik taasiniarput
Demokraatit isumaqarput Finn Karlsenip aalisarnermut, piniarnermut nunalerinermullu naalakkersuisuunerani pisimasut takutikkaat atorfimmut tassunga tulluartuunngitsoq. Taamaammat ataasinngornermi immikkut ittumik Inatsisartut katersorneranni Finn Karlsen Naalakkersuisutut ivertinneqalerpat Demokraatit akerliullutik taasiniarput.
Atuaruk: IA: Taamaammat taaseqataassanngilagut
Ataasinngornermi Inatsisartuni oqallinnermi Demokraatit oqaaseqartussaata Anda Uldumip oqaasissani tamakkerlugit avammut tusarliunnianngikkallarpai. Isertuutinngilaalli Finn Karlsenip aalisarnermut, piniarnermut nunalerinermullu naalakkersuisutut ivertinneqarnissaa Demokraatit akerliuffigimmassuk.
Atuaruk: Jens I. aningaasaqarnermut akileraartarnermullu ataatsimiiititaliami siulittaasunngussaaq
500 millioner koruunit
- Hans Enoksenip naalakkersuisuutitaani Finn Karlsen naalakkersuisuni ilaasortaagallarmat eqqissisimasoqanngilaq. Ilimaginngilarput Finn Karlsenip allanngorsimanissaa. Taamaammat naalakkersuisuni ilaasortassatut tatiginngilarput, Demokraatit sinnerlugit Inatsisartuni ilaasortaq Anda Uldum Sermitsiaq.AG-mut oqarpoq.
Atuaruk: Hans Enoksenip Finn Karlsen taperserniarpaa
2009-mi qinersinissap tungaanut Finn Karlsen aalisarnermut, piniarnermut nunalerinermullu naalakkersuisuuvoq.
Atuaruk: Naalakkersuisooqatigiit ima ingerlaqqissapput
- Taamani qinersinerup kinguninngua Inatsisartut Royal Greenlandimut 500 millioner koruuninik aningaasaliisariaqalerput. Taama pisoqarpoq Finn Karlsenip suliani naammaginartumik naammassisimanngimmagu, Anda Uldum oqarpoq.
Finn Karlsenip naalakkersuisuni ilaasortanngornissaanut Demokraatit akerliullutik taasiniarput, Inuit Ataqatigiit taaseqataanngiinnalersaartut. Attaviitsoq Hans Enoksen Finn Karlsenip naalakkersuisunngornissaanut tapersiiluni taasiniarpoq.