Naalakkersuisooqatigiit ima ingerlaqqissapput

- Naak massa naalakkersuinikkut sulinermi illuatungeriit akornanni tamakkiisumik isumaqatigiinneq anguneqarsinnaajuaannanngikkaluartoq, taamaattoq Naalakkersuisooqatigiit nangittumik sulissutigissavaat nuna ataasiusoq – inuiaat ataatsimoortut.

Naalakkersuisooqatigiit Siumut Atassullu ataatsimut tusagasseeqatigiipput.

Finn Karlsenip aalisarnermut piniarnermut nunalerinermullu naalakkersuisunngornissaanut atatillugu killiffitsik qanorlu ingerlariaqqinnissartik nalunaarutigaat.

Taamaaliornikkut Siumup aammalu Atassut-ip Inatsisartuni ilaasortaatitaasa Naalakkersuisuutitaasalu suleqatigiilluinnarlutik qulakkeerniarumavaat inuiaqatigiinni innuttaasut inuussutissarsiutinillu ingerlataqartut nunatsinni sumiikkaluarunilluunniit inuiaqatigiit ineriartornerannut peqataalluarnissaannut sinaakkutassaqartitsilluarnissaq.

Tamanna ilaatigut pissaaq:

• Sanaartugassat siammarterneqarnissaannik pilersaarutaasut timitalersorneqarnerisa Nunatsinni Kommunit peqatigalugit periarfissatigut sukkatsisinneqarnerisigut.
• Aalisarnermik inuussutissarsiuteqartut suleqatigilluinnarlugit nunatsinni aalisarnerup tunisassiornerullu aningaasarsiornikkut suliffissaqartitsinikkullu aaqqissorneqarneratigut.
• Piumasaqaatit annikillinngikkaluarlugit aatsitassarsiorumallutik soqutiginnittut eqaannerusumik siunnerfeqarnerusumillu suleqatiginerisigut.

Ammasumik sulisoqassaaq
- Matumani immikkut tikkuarneqartut suliassarpassuit ilamininnguaraat taamaattorli inuiaqatigiit ineriartornerannut pingaaruteqarluinnartut, taakkulu immikkut erseqqissaatigineqaraluartut qularutigineqassanngilaq Naalakkersuisooqatigiinnermi anguniagassatut isumaqatigiissutigineqartut periarfissat tamaasa atorlugit naammassiniarneqarnissaat nangittumik sulissutigineqassammat, Siumut Atassullu nalunaaruteqarput. Nalunaaruteqartuupput Siumup siulittaasua Aleqa Hammond, Siumup gruppiani siulittaasoq Jens Immannuelsen kiisalu Atassutip siulittaasua Gerhardt Petersen Atassutillu gruppiani siulittaasoq Knud Kristiansen

- Naalakkersuisooqatigiit partiivisa pingaartilluinnarpaat nunatta ineriartortinneqarnerani innuttaasut peqatigilluinnarneqarnissaat, taamaammat ammasumik aammalu suleqatigiinnermik aallaavilimmik sulineq nanginneqassaaq.

- Tamanna pissaaq innuttaasut ataasiakkaat, soqutigisaqaqatigiikkaat, inuussutissarsiornermik ingerlataqartut aammalu pisortat suliffeqarfiutaanni sulisut qanimut suleqatigalugit Naalakkersuinikkut sullissinerup aalaakkaasuullunilu pitsaasuunissaanik qulakkeerinninnikkut, Siumut Atassullu nalunaarput.