Binzerip Polar Seafoodimi aallussassai: Sinaakkutit ersarissut aamma aningaasaliinerit atajuartut
Michael Binzerip Polar Seafoodimi siulersuisuni siulittaasutut atorfik Henrik Lethimit kingoraarpaa, taanna ukiuni aqqanilinni siulittaasuusimavoq. Siulittaasup pisortanut nutaanut patajaatsumik tapersersuineq aamma ingerlatseqatigiiffiup inuussutissarsiornermut atajuartumut ingerlatinnissaa aallunniarpai.
Polar Seafood Michael Binzerimut soqutigisaqarfik nutaajunngilaq, taanna ukiuni aqqaneq-marlunni siulersuisuniissimavoq, pilersitsisullu Anders Brøns aamma Jens Salling aallaqqaataaniilli ilisarisimavai.
Taamaakkaluartoq siulersuisuni siulittaasutut atorfimmut akuersinnginnermini eqqarsarluaqqaarsimavoq, eqqortumillu misigaluni aalajangersimalluni, taanna Sermitsiaq.AG-mut oqaluttuarpoq.
- Suliffeqarfimmi immikkuullarissumik anersaaqarpoq, inunnut sulisunut tunngasoq. Amerlasuut sivisuumik tamaaniipput, ingerlatseqatigiiffimmut ataqatigiinnermullu tamanna sunniuteqarpoq. Tamanna anersaamik immikkuullarissumik pilersitsivoq, anersaarlu taanna uanga nuannaraara, Michael Binzer oqarpoq.
Kinguaariit nikinnerat malinnaaffigalugu ingerlanniaraa
Taanna ukiut arfineq-marluk arfineq-pingasullu matuma siornagut suliffeqarfimmi kinguaariit nikinnissaat aallartisarneqalermat siulersuisuneereerpoq.
- Suliaq taanna annertuumik akisussaassuseqarfigalugu misigisimavara, Mikip aamma Bentip nunatsinni suliffeqarfiit namminersortut annersaanni pisortatut ineriartoqqinnissaannut pilersitsinissara pingaartippara, kalaallinut inuiaqatigiinnut annertoorujussuarmik isumaqarnera pissutigalugu. Taamaammat uannut isumaqarluinnartuuvoq.
Siulersuisuni siulittaasunngortup naalakkersuinikkut ingerlatsineq ukiuni tulliuttuni unammillernartoqartussatut isigaa.
- Aalisarnermut sinaakkutit suli nalornissutigineqarput. Annertuunik aningaasaliinissatsinnut tunngatillugu siunissami pisassiissutinut tunngavinnut aamma aalisarnermut pisinnaatitaaffinnut tunngasut ukiut 15-20-t qaangiuppata sinaakkutissat ilisimareernissaat kissaatigaarput.
Aalisarneq pillugu inatsimmik nalornissuteqarnerup inuussutissarsiorneq tativaa
Miki Brønsip aamma Bent Sallingip kilisaatinut avataasiutinut maanna aningaasaliisariaqarlutik, qanittukkut Sermitsiaq.AG-mut ilisimatitsissutigaat, taakku inatsisitigut sinaakkutissat nalornissutaanerat pillugit ukiuni arlalinni uninngatinneqartariaqarsimapput. Aningaasaliinerit taakku maanna utaqqisinnaajunnaavipput, pisortat oqarput.
Aalisarneq pillugu inatsisissamut nutaamut siunnersuut ukioq manna ukiaanerani ataatsimiittoqarnerani saqqummiunneqassasoq, Naalakkersuisut nalunaarutiginikuuaat.
Tassanilu aalisarneq pillugu ataatsimiititaliarsuup pisassiissutinik agguaassisarnermi isertuanngitsumik pisarnissaanik inassuteqaataa inatsimmi nutaami ilanngunneqassasoq, siulersuisuni siulittaasup ilaatigut neriuutigaa.
- Pisassiissutinik agguaasarnernut aalajangiinernut tunngavigineqartut aamma IOK-nut (pisassiissutit immikkut tunineqarsinnaasut) pillugit atugassarititaasut ersarissuussapput, taamaalilluni aningaasaliinernut tunngatillugu najoqqutarineqarsinnaassammata.
Aningaasaliinernut tunngatillugu Polar Seafoodip ukiuni aggersuni taakku ukkatarisassarai, Michael Binzer oqaluttuarpoq.
- Kalaallit Nunaanni atajuartumik aalisarnerup ineriartortinneqarneranut tunngatillugu annerusumik iliuuseqarnissarput aamma kilisaatit nutaaliaasut silap pissusianut sunniuteqannginnerusut atulerneqarnissaat anguniarpara.
Raajat ataasiakkaat pissarsissutiginerunissaat
Tunisassiorfinnilu aamma nalillit annertusarnissaannut tunngavoq, tassami aalisakkat imaluunniit raajat ataasiakkaat pissarsiaqarfiginerunissaat kalaallinut inuiaqatigiinnut pingaaruteqarmat, taanna oqarpoq.
- Aalisagaqassutsitta pitsaanerusumik atajuartumillu atorluarneqarnerunissaannut periarfissani salliunissaq eqqarsaatigisorujussuuara.
Taamaammallu aamma kilisaatit nutaat aamma hybridinik motooreqarnissaannut periarfissat misissorpaat, aalisarnermut atortut avatangiisinut pitsaanerusut, aamma tunisassiorfinni tunisassiornerit pisariillisarnissaat, taamaalilluni saniatigut pisaqartarneq annikillisarneqassalluni.