Brøns aamma Salling: Uuliap saattussallu akiisa suliffeqarfiup angusai sunnersimavaat
Polar Seafood misilittagartuunik siulersuisoqarluni, pisortanillu nutaanik suliffeqarfiup inuiaqatigiinnut sunniuteqarnera sulerineralu pillugit ammanerusumik ingerlatserusuttunik aquttoqarluni siunissamut ingerlavoq.
Polar Seafoodimi pisortat nutaat marluk siullermeerlutik suliffeqarfiup naatsorsuutaanik siulersuisunut pingasunngormat tunniussaqarput.
Naatsorsuutit sinneqartooruteqarfiulluarput, naak ukioq naatsorsuiffiusoq unammillernartoqarluarsimagaluartoq, pisortanngorlaat Sermitsiaq.AG-mut oqaluttuarput.
- Unammillernarnerpaasimasoq tassaavoq saattussat ukiup affaani kingullermi, saattussammi tunisat ikileriarujussuarput, Bent Salling oqarpoq.
- Uuliap akii uagutsinnut aamma ilungersunarsimapput, soorlu suliaqarfiup iluani tamarmi aamma ilungersortitsisimasut, Miki Brøns oqarpoq.
Siulersuisut nangitsisuussapput - aqutsisut nutaaliortuullutik
Pisortaasut marluk oqaluttuarput siulersuisunngortut nutaat suliffeqarfimmik, siunertaanillu ingerlatsitseqqiinissamik qulakkeerinnittut.
Siulersuisut misilittagartuut, aqutsisunik nutaqqanik tapersersuisuussapput. Jens Friis-Sallingimmi pisortatut tunuarami suliffeqarfimmik piginneqataassutsini meeqqaminut marlunnut tunniussimavaa, Miki Brønsillu ataatami 2018-imi ajunaarnerata kingorna piginnittuunera aamma kingornussimallugu.
Naak suliffeqarfik anguniakkatigut ingerlaqqissagaluartoq, taamaattoq nutaaliortoqarnissaa allaanerusumillu ingerlatsisoqarnissaa, pisortat oqaluttuaraat. Inuiaqatigiinnut politikerinullu suliagut pillugit ammanerusumik ingerlatsilissaagut, paasissutissiinerullutillu.
- Inuussutissarsiutigisarput pillugu paasissutissiinerunissaq suliniutigissavarput. Polar Seafoodip inuiaqatigiinnut iluaqutaalluartarnera, suliffeqarnikkullu aamma iluaqutaalluartarnerata paasineqarnissaa kissaatigaarput. Tamanna tulluusimaarutigaarput, Bent Salling oqarpoq.
Sulisut peqataatinneqarnerulissasut
Sulisut piginnaasaat aamma atorluarneqarnerulissasut oqaatigineqarpoq.
- Ulluinnarni ingerlatsinitsinni sulisut peqataatinnerulerusuppagut. Sulisut qitiusut peqataatinneqarnerulernikuupput, soorlu allaffimmi, kilisaatini tunisassiorfinnilu. Sulisorisatta immikkut ilisimasaat atorluarnerulerpagut, taakkuuppummi suliffeqarfimmik ingerlatsisut, Miki Brøns oqarpoq.
- Ammanerunerunerput siornatigornit allaanerusoraara. Suliffeqarfimmi sulisunillu suleqateqarnermik nutaaliaanerusumik ingerlatsivugut, Bent Salling oqarpoq.
Suliffeqarfiit allat assigalugit suliffeqarfimmi ukkatarineqarluartoq alla tassaavoq nunaqavissunik atorfinitsitsiniarneq.
Sulisussarsiorneq suli unammillernartoq
Pisortat neriuutigaat suliffeqarfiup ingerlariuseqarnera pillugu ammaneruneq atulerpat sulisussarsiorneq aamma pitsaanerulissasoq.
- Sulisussarsiornissaq suli pisariaqarluinnarpoq, sulisussanillu nutaanik atorfinitsitsisinnaassagutta innuttaasut ilisimasariaqarpaat suliffeqarfik qanoq ingerlanneqarnersoq, Miki Brøns oqarpoq.
Polar Seafood skipperinik, maskinmesterinik tunisassiorfinnilu pisortanik ilinniartitsinertik pingajussaat aallarteqqammerpaat. Ilinniartuusimasut arlallit kilisaatini qitiusumik atorfeqarlutik maanna sulilersimasut, pisortat oqaluttuarput.
- Piffissaliussanik ingerlatsinerupput. Ilinniartunimmi ukiut tamaasa ajoraluartumik aallartitsisinnaanngikkallarpugut, neriuutigaarpulli inuussutissarsiornermi sulisussaqarniarnikkut kajungernarneruleriartortitseqataassasoq, Miki Brøns oqarpoq.