Bilitsit ullumimiit pisiarineqarsinnaalerput

Kiffartuussinermut isumaqatigiissutit kiisami inissipput, Air Greenlandillu bilitsinik ullumimit tuniniaaqqilerpoq.

- Inissitassat kingulliit inissimmata nuannaarutigisorujussuuara, taamaalillunilu ukiut tulliuttut ataatsimut isigalugit, minnerunngitsumillu juullimut atatillugu angallannissaq immikkut eqqarsaatigalugu angallannissat toqqissisimasumik ingerlanneqarsinnaalerput, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Martha Lund Olsen tamatumunnga atatillugu allappoq.

Atuaruk: Neqerooruteqartarneq pillugu Namminersorlutik Oqartussat malittarisassaateqanngillat

Qaanaaq eqqaanilu, Upernavik eqqaanilu, Uummannaq eqqaanilu, Tasiilaq eqqaanilu, Ittoqqortoormiiniit Nerlerit Inaannut qulimiguulimmik timmisartuussisarnermi, kiisalu Kalaallit Nunaata avannaata timmisartut suluusallit atorlugit sullinneqarnerani angallannermi suliassat tassani pineqarput.

Naalakkersuisoqarfik aamma Air Greenland isumaqatigiinniuteqareerlutik atsiornissamut piareersimapput, taamaalillunilu neqerooruteqartut angallannermi suliassanik tunineqarsimanngitsut itigartitsissutinik inaarutaasunik nassiussivigineqassasut, naalakkersuisoqarfik ilisimatitsivoq, ilanngullugulu tapiliussatut isumaqatigiissutit naammassinerarpaat.

Atuaruk: Aluukkut sooq toqqarneqannginnerlutik paasisimanngilaat

Qulimiguulinnut akikilliliineq
- Kiisalu nuannaarutigaara tapiliussatut isumaqatigiissutit siulliit inissimmata, taamaalillunilu Kalaallit Nunaata kujataani ukiuunerani qulimiguulinnut isumalluutit amerlanerusut neqeroorutigineqarsinnaalerput. Pingaartumik Nanortalimmi angallannikkut pissutsit tapiliussanik isumaqatigiissusiornikkut sullinneqarneq annertuumik kivitsivigineqartussaavoq, Martha Lund Olsen allappoq.

- Disko Linemiillu uannut ilisimatitsissutigineqarpoq, sapaatip akunnerata matuma aallartinneraniit qulimiguullit ilassutissaannut bilitsinik tuniniaasoqalereertussaasoq, taamatullu Nanortalimmut imaatigut angallassinerit immikkut ittumik ilaneqartussaallutik. Kiisalu sapaatip akunneranni matumani Qaqortup Narsarsuullu akornanni angallavimmi, kiisalu Qeqertarsuup Tunuani tamarmiusumi qulimiguulinnut bilitsit akikillineqarsinnaaleriissapput, taanna allappoq.

Atuaruk: Naalakkersuisoq: Aaqqiissutissat akikinnerpaartaat nassaaraarput

Siunissami qaninnermi isumaqatigiissutit kingulliit matuneqarnissaat, taassuma naatsorsuutigaa.

- Tapiliussatut isumaqatigiissutit kingulliit ulluni sapaatillu akunnerini qaninnerni inissinnissaat naatsorsuutigineqarpoq, tassanilu aamma kinguaattoornerni inissinneqartarnissaq nerisaqartinneqartarnissarlu, aammalu bilitsinut annaasanut taarsiiffigineqartarnissaq pillugu ilisimatitsisoqarumaarpoq, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq nalunaaruteqarpoq.