Skip to main content

Aluukkut sooq toqqarneqannginnerlutik paasisimanngilaat

Aluu Airlinesip qaammatit arlallit qaangiutereersut, sooq toqqarneqannginnerlutik tunngavilersuummik suli pissarsisimanngillat. Tunngavilersuummik taakku piumasaqarsinnaatitaapput

Kiffartuussinermut isumaqatigiissutinit toqqarneqartunit pitsaanerusumik neqerooruteqartoqaraluarpa? Sapaatip-akunnerini makkunani ingammik nittartakkakkut attaveqatigiittarfinni annertuumik oqallisaavoq.

Taamaakkaluartoq ingerlatseqatigiiffiup Aluu Airlinesip ajorsartup pisortaata, Pele Brobergip tamanna apeqqut ataatsimut akisinnaanngilaaluunniit.

Tupinnanngitsumik pitsaasumik aaqqiissummik peqarsimallutik taanna isumaqarpoq, allaat nammineq isumaa naapertorlugu toqqarneqartumit akikinnerusumik suliarinnissinnaaneraraluarpoq.

Tunngavilerneqanngitsoq
Kisianni ulloq manna tikillugu sooq neqeroorutaat toqqarneqarsimannginnersoq ilisimanngilaa.

- Itigartitsinermut tunngavilersuititsiniarluta marloriarluta nukingisaarinikuuvugut, kisianni suli akineqarnikuunngilagut. Maanna aamma nukingisaareqqeqqammerpunga, Pele Broberg oqarpoq.

Atuaruk: Niuernikkut unioqqutitsilluni isumaqatigiissuteqartoqarsimaneranik pasitsaassineq

Tunngaviliiffigineqarnissaminnut taakku pisinnaatitaaffeqarnerat apeqqusigassaanngikkaluarpoq. Tassami suliarinnittussarsiornermut najoqqutassani ersarissumik allaqqagaluarpoq.

- Namminersorlutik Oqartussat ingerlatsisussatut toqqarneqartunik isumaqatigiissusiorpata, ingerlatsisut allat itigartitsissummik tunngavilersukkamik tigusaqarumaartut atortussiani allassimavoq.

 

Suna ajoqutaanersoq nalugaat

Mannali tikillugu Aluu Airlines nutaarsiassanik pissarsiumalluni tusagassiuutini malinnaasariaqartarpoq.

- Neqeroorutitsinni suna ajornartorsiutaanersoq paasisinnaannginnatsigu eqqumiigaara. Suliariumannittussarsiuussinermi toqqammavissaatitaasunut naammassinninnginnerput taamaallaat taamaallaat tusagassiuutinit tusarparput,  Pele Broberg oqarpoq.

Taamaammallu suliffeqarfimmi maanna matoreersumi pisortap eqqortumik eqqunngitsumilluunniit tunngaveqartumik atorneqannginnissamik aalajanngiivigineqarsimanertik akisinnaanngilaa.

- Imaassinnaavoq suliariumannittusarsiuussinermi arlaannik paasinerluisimasugut, itigartitsinermullu tunngavilersuutit ilisimanngikkukkit, taamaattoqarnera oqaatigisinnaanngilara, taanna erseqqissaavoq.

Isumaqatiginninniartoqanngitsoq 
Suliffeqarfimmi toqqannginneqaannanngilaq, isumaqatiginninniarnermullu aamma aggersarneqanngillat. Tamanna suliariumannittussarsiuussinermi allassimagaluarpoq.

- Isumaqatiginninniarnerit ingerlanneqarnissaat tunngavissaatillugu, isumaqatiginninniaqqaarnermut peqataatitat naleqquttumik neqerooruteqartut tamaasa Namminersorlutik oqartussat aggersalersarpai.

Aluu Airlainesili aggersarneqanngilaq.

- Neqeroorutitta tunniunneqarnerata kingorna naalakkersuisoqarfimmut isumaqatiginninniariartoqquneqanngilagut, Pele Broberg erseqqissaavoq.

Taamaammallu Namminersorlutik Oqartussat Aluu Airlinesip neqeroorutaani annertuumik ajornartorsiuteqartoqarneranik isumaqarsimanerat kisimi eqqarsaataasinnaavoq. Taakkumi neqeroorummi 'angallassinermi suliassat imaanik annertussusaanillu tunngaviusumik paasinerluisoqarsimappat' neqerooruteqartumik isumaqatiginninniarnissaq aatsaat itigartissinnaavaat.

Tunngavigineqartulli eqqortivinnissaat isumagisimagitsik Pele Brobergip aalajangiusimavaa.

- Suliariumannittusarsiussinermi toqqammavigineqartut ajornerulersinnagit neqeroorutitta nalimmassarnissaannut iliuuseqassagutta isumaqatiginniarnissamut aggersarneqarnissarput tunngavissaavoq, neqerooruteqartullu allat taamak pineqarsimasut takusinnaavarput, ilami taakkuluunniit suliariumannittussarsiuussinermi piumasaqaataasut malittariaqarsimanngilaat, Pele Broberg oqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER