Aaja Chemnitz Larsen: Meeqqat inuusuttullu atornerlunneqarsimasut pillugit ikiuigasuarnissamut aningaasaateqarfiliortoqarli

Aaja Chemnitz Larsenip takorusulluinnarpaa ikiuigasuartoqarnissaanut aningaasaateqarfiliortoqassasoq. Aningaasaateqarfiup qulakkiissaavaa meeqqat inuusuttullu kinguaassiutitigut atornerlunneqarsimasut pitsaasumik ikiorserneqarnissaat.

Folketingimut qineqqusaartoq tusagassiutinut nalunaaruteqarluni taama allappoq.

- Aalisartut ikiorasuarneqarnissaannut aningaasaateqarfiliorsinnaagutta, taava sooq meeqqanut
atornerlunneqarsimasunut taamatut pilersitsisinnaassanngilagut? Aaja Chemintz Larsen tusagassiutinut nalunaarutimini aperivoq.

Meeqqat ikiortariaqartut pisortanit sumiginnarneqartarnerat pillugu oqallinneq sakkortuseqqinnerani, siunnersuuteqarpoq.

Tasiilami meeqqat pillugit piviusulersaarut sakkortooq

DR-ip piviusulersaarutaani ”Byen hvor børn forsvinder”-imi Kommuneqarfik Sermersuup Tasiilami suliassanik pinasuartumik suliarineqartussanik uninngatitsiinnarsimanera pillugu saqqummertoqarmat, tamanna mamiagineqangaatsiarpoq.

Nuna tamakkerlugu tamanna atuuppoq

Aaja Chemnitz Larsen, politikerillu allat nuimanerusut, Tasiilami pisut kisimiinngitsut erseqqissaatigisarpaat. Ajornartorsiutit nunami tamarmi atuupput.

- Inoqarfippassuarni inunnut ikiuinikkut ikiortariaqavissutut sivisuumik inissisimasoqarsimavoq, soorlu Tasiilami, aammalumi sumiiffinni allani tamanna takugipput. Taamaattumik massakkorpiaq
arlalitsigut iliuuseqartoqartariaqarpoq, Aaja Chemnitz Larsen oqarpoq.

Siunnersuutit arlallit

Inatsisartut tamarmiusut piumasaat malillugu Naalakkersuisut Danmarkimut ikioqqussallutik akuersiinnarput. Pissutsit qanoq innersut misissuiffigeqqaarlugit ilumut naalagaaffimmut ikioqqussanerlutik Naalakkersuisut aatsaat aalajangissasut, isumaginninnermut naalakkersuisoq, Martha Abelsen (S) arlaleriarluni ersarissaasareeraluarpoq.

Danmarkimit ikiorneqarnissamut siunnersuut Naalakkersuisut taperserpaat

Meeqqat inuusuttullu kinguaassiutitigut atornerlunneqartut ikilisinniarnissaannut IA-mi politikeri arlalinnik siunnersuutissaqarpoq.

Meeqqat inuusuttullu kinguaassiutitigut atornerlunneqartut ikilisinnissaannut siunnersuutit:

• Iliuusissanut pisariaqartunut aningaasassaqarnissaq qulakkeerniarlugu ikiuigasuarnissamut aningaasaateqarfimmik pilersitsinissaq
• Eqqartuussivikkut suliat pilertornerunissaat atornerluisutullu nassueruteqarnermi ingerlaannartumik pineqaatissiisarnissaq. Suliassat ukiuni arlaqartuni uninngatinneqartassanngillat.
• Angajoqqaatut piginnaasat qaffassarnissaannut ilaqutariinnut 0-miit 2-nut ukiulinnik meerartalinnut kostskoleliornissaq. Tamanna danskit aningaasaateqarfii suleqatigalugit pilersinneqarsinnaavoq.
• Suligasuartitatut angalatittagassanik pilersitsinissaq, atorfeqarnikkut pitsaasunik atugaqartunik suliaminnullu naapertuuttunik ilisimasalinnik inuttaqartunik
• Innuttaasut eqqugaasut tamaasa paasisaqarfiginissaat, assersuutigalugu nuunnissamut, qanoq ikiorserneqarnissamut, psykologimik oqaloqateqarnissamut pisariaqartitaat paasiniarneqarlutik, neqeroorfigineqarasuarnissamullu piginnaatitaaffilerlugit.
• Ataatsimut iliuuseqarnermi ilinniagaqarnissaq, sumiiffinni suliffiit nutaat pilersinneqarnissaat pitsaanerusunillu neqerooruteqarnissat ilaassapput.
• Meeqqat ornittagaat Armangivat kommunemiit ingerlatsinermut taperneqassaaq, tassa ulloq unnuarlu ammasinnaanngortillugu akissarsinerullu nalaani orniguffissatut inissillugu.
• Danmarkimiit aningaasatigut taperserneqarnikkut meeqqanut illut, meeqqanut sumiginnarneqarsimasunut atornerlunneqarsimasunullu katsorsaaviusinnaasut pilersinneqartariaqarput.

- Kinguaassiutitigut atornerluinerit kinguaariit ingerlaneranni piuarnerat nunatut ajorluinnartumik ajornartorsiuittutullu inissisimatitsivoq. Inuunerit sequminneqartarput, inuit atornerluisunngortarput imminornerillu pisarlutik, tamannalu nunatut ajornartorsiuittutut inissisimalersitsivoq. Naalakkersuisut
aalajangiisinnaassuseqartut iliuuseqarsinnaasullu, taamatullu oqallinnermi taqissimanngitsut ajornartorsiutinillu kommuninut kaamiiginnanngitsut maqaasivakka, tusagassiutinut nalunaarutimini allappoq.