Danmarkimit ikiorneqarnissamut siunnersuut Naalakkersuisut taperserpaat

Peqqissutsimut isumaginninnermullu naalakkersuisup Martha Abelsenip (S), sumiginnaanerit, kinguaassiutitigut kannguttaatsuliornerit aamma imminut toquttarnerit pillugit isumaginninnikkut ajornartorsiutit annertuut aaqqinniarlugit, Danmarkimit ikioqqulluni saaffiginnissuteqarnissamut siunnersuut maanna tapersersulerpaa.

Naalakkersuisut avaqqullugit amerlanerussuteqartut ikiorneqarnissamik siunnersuuteqartunut akissuteqaammini taanna taama oqarpoq.

- Naalakkersuisut kissaatigaat, Tasiilami Kalaallillu Nunaata sinnerani ajornartorsiutit pilertornerpaamik aaqqinneqarnissaat, Martha Abelsen (S) taama oqarpoq.

- Naalakkersuisut isumaqarput siunnersuummi siunertaq tulluartuusoq tapersersortariaqartorlu.

Siornatigut itigartitsissutigigaa

Taamaalilluni Martha Abelsenip tungaanit annertuumik isummamik allannguineq tassani pineqarpoq. Siornatigut ikiorneqarnissamik qinnuiginninnginnermi apeqqut qulaajarneqaqqaartariaqartoq isumaqarluni oqaatiginikuuaa.

- Meeqqanut, inuusuttunut imaluunniit ilaqutariinnut immikkut ittunik suliniuteqartoqartariaqartoq ilisimavarput, aamma kommuni pissutsinik ilisimannippoq, ikiorsiinerup qanoq iluarsaanneqarnissaa oqaloqatigiissutigitinnagu Naalakkersuisuni partiit ikiorneqarnissamik piumasaqaat isummerfigiuminaatsipparput, siornatigut KNR-imut taama oqariartuuteqarpoq.

Danskit oqartussat suleqatigineqareersut, Martha Abelsenip ullumi uteqqippaa. Tamatuma saniatigut isumaginninnermik suliassaqarfik kommunit akisussaaffigigaat oqaatigaa.

- Naalakkersuisut kissaatigaat, Tasiilami Kalaallillu Nunaata sinnerani ajornartorsiutit pilertornerpaamik aaqqinneqarnissaat. Tamatumunnga oqartussaqarfiit assigiinngitsunik suliallit akornanni annertuumik suleqatigiinnissaat pisariaqartinneqarpoq, kikkullu tamarmik akisussaaffimmik tigusisariaqarput. Minnerunngitsumillu Kommuneqarfik Sermersuup iliuusissanut pilersaarummik aamma maannamut naleqqiullugu qaffasinnerungaatsiartumik qaffasissusilimmik, ajornartorsiutinik aaqqiiniarnissaa anguniarlugu suliniummik ineriartuinissaa pisariaqartinneqarpoq, taanna oqarpoq.

- Kommunit suliassamik kivitsisinnaappat?

- Naammattumik sulianik suliarinnittarnissaq aamma sumiiffinni ikiorneqarnissamut periarfissanik pisariaqartinneqartunik pilersitsinissaq kommunit akisussaaffigaat. Naalakkersuisut qallunaat naalagaaffiat meeqqanut inuusuttunullu suliassaqarfimmi suliassat pillugit kivitsinissamut ikiueqqullugu qinnuigippassuk, taava soorunami apererusunnassaaq: Kommunit suliassamik kivitsisinnaappat? Nunami politikeriusugut tamanna pillugu isummertariaqarpugut.

- Aaqqiissutissat innuttaasuni aallartissapput. Aammattaaq kommunit inatsimmik unioqqutitsinnginnissaat aamma atugassiissutiminnik tulluarnerpaamik atuinissaat piumasaqaataassaaq, taamaalilluni Tasiilamisut sulianik suliarinnittarneq amigaataaqqunagu.

- Naalakkersuisut isumaginninnermi suliassaqarfimmik ineriartortitsinerup qallunaat oqartussaasui suleqatigalugit ingerlatiinnarnissaa siunertaraat. Naalakkersuisut kommunit aqutsinerat sulianillu suliarinnittarnerat pillugit ingerlaavartumik pitsanngorsaaneq suliaraat. Tamatuma saniatigut Naalakkersuisut meeqqanik inuusuttunillu sumiginnaasarneq akiorniarlugu nuna tamakkerlugu iliuusissanut pilersaarummik suliaqarput, taassumalu ukiami 2019-imi saqqummiunneqarnissaa naatsorsuutigineqarpoq. Tamatumunnga siunertaavoq, iliuusissanut pilersaarutip isumaginninnermi suliassaqarfik tamaat kivissagaa. Iliuusissanut pilersaarutip ilaatigut aqutsinermi unamminartut, kommunini tamani naammattuugassaasut, aaqqiivigineqarnissaat immikkut ittumik ukkatarissavai.