Takussutissaq: Kikkut akiitsoqarsimanersut takukkit

Kukkunersiuinermik suliaqartut Deloittekkut Naalakkersuisuni ilaasortaasimasut 2009-miit 2014-mut Namminersorlutik Oqartussanut akiitsorilersimasaannik misissuinerisa takutippaa Naalakkersuisuni ilaasortaasimasut arfineq marluk nunatta karsianut inuttut akiliutsikkallartarsimasut.

Atuaruk: Aajuna kukkunersiuisut nalunaarusiaat

Sisamat Kuupiup Naalakkersuisuutitaqarnerani
Qinersivimmi 2009-miit 2013-imut Naalakkersuisuni ilaasortaasimasut sisamat nunatta karsianut annerusumik minnerusumilluuniit inuttut nammineq atukkaminnut akiliutsikkallartarsimapput.

Pineqartut tassaapput Anthon Frederiksen, Kuupik Kleist, Mimi Karlsen aamma Ove Karl Berthelsen.

Kattusseqatigiit Parteererisimasaaneersoq Anthon Frederiksen, nunamut namminermut, pinngortitamut avatangiisinullu naalakkersuisuusimasup nunatta karsia 2009-mi, 2010-mi kiisalu 2012-mi nammineq atugassaminut katillugit 44.432 koruuninik akiliisikkallartarsimavaa. Akiligassarilersimasanili akilereersimavai.

Inuit Ataqatigiit ilaqutariinnermut, kulturimut, ilageeqarnermut nalingiisitaanermullu naalakkersuisuutitarisimasaat Mimi Karlsen aamma nunatta karsianik atuisimavoq 2012-imi katillugit 2.717 koruuninik. Kisianni taassuma Anthon Frederiksenituulli akiligassani akilersimavai.

Inuussutissarsiornermut aatsitassanullu naalakkersuisuusimasup, Inuit Ataqatigiinnersup Ove Karl Berthelsenip aamma Namminersorlutik Oqartussat 2012-imi nammineq atukkaminut 17.522 koruuninut akiliisissimavai, taakkuali aamma utertereersimavai.

Taakkunani sisamani akiliutsinnerpaasimavoq Naalakkersuisut siulittaasorisimasaat nunallu allanut naalakkersuisuusimasoq Inuit Ataqatigiinnersoq Kuupik Kleist. Deloittep misissuinera naapertorlugu taassuma nunatta karsia katillugit 102.307 koruuninut akiliisissimavaa Naalakkersuisuni siulittaasuunermi nalaani. Misissuinerullu ersersippaa taakkunannga 20.288 koruunit suli akilersimanngikkai.

Atuaruk: Ataatsimiisitaliaq: Bankboksi ammarneqarpoq

Aleqap nalaani marluk
Deloittep misissuinerata aamma takutippaa Aleqa Hammondip Naalersuisuutitaqarnerata nalaani 2013-imiit 2014-imut ilaasortaasimasut marluk nunatta karsianut akiliutsittarsimasut.

Naalakkersuisut Siumullu siulittaasorisimasaa Aleqa Hammond, Deloittep misissuinera naapertorlugu, nunatta karsianit katillugit 190.760 koruuninik Naalakkersuisunut siulittaasuunermi nalaani akiliunneqartarsimavoq. Akiitsorilikkani arlaleriarluni nukingisaarneqareernermigut akilerpai.

Peqqissutsimut attaveqarnermullu naalakkersuisuusimasup, Atassummeersup Steen Lyngep aamma nunatta karsia inuttut atugassaminut akiliutsiffigigallartarsimavaa katillugit 48.647 koruuninut. Taakkuali Aleqa Hammondimut suliaq saqqummermat erngerlugit ukiarmi akilerpai.

Deloittep Naalakkersuisuni ilaasortaasimasut akiitsorilersimasaannik misissuinerata takutippaa, Kuupik Kleistip akiligassai 20.288 koruunit minillugit, pineqartut akiligassatik akilersimagaat.

Atuaruk: Kuupik Kleistip misissuinerup inernera akuerinngilaa

Atuaruk: Misissuisimaneq qinersisoqareerpat aatsaat saqqummiunneqarsinnaavoq

Deloittep piffissami 2009-imiit 2014-imut Naalakkersuisunut ilaasortat Namminersorlutik Oqartussanut akiligassaannik misissuinera pdf-nngorlugu allaaserisap talerpiatungaani takusinnaavat