misissuineq
Misissuisimaneq qinersisoqareerpat aatsaat saqqummiunneqarsinnaavoq
Deloittep Naalakkersuisuni ilaasortat ilaasortaasarsimasullu nunatta karsianik atuisarsimanersut pillugit misissuisimanera aatsaat qinersisoqareerpat saqqummiunneqarsinnaavoq. Inatsisartut siulittaasorigallagaat taama ilisimatitsivoq
Partii Naleqqap siulittaasuata, Hans Enoksenip, aamma Naalakkersuisuni ilaasortaasimasup, naalakkersuisuini ilaasortat ilaasortaasarsimasullu nunatta karsianik atuisarsimanersut pillugit misissuisimanerup avammut saqqummiunneqarnissaa kissaatigaa.
Tamanna pivoq Hans Enoksen ilisimatinneqarsimammat Naalakkersuisuni ilaasortat ilaasortaasarsimasullu pillugit misissuisimaneq maanna naammassisimasoq.
Aamma kukkunersiuisut Deloittep misissuisimanera maanna piareersimavoq.
Taama oqaluttuarpoq Inatsisartut siulittaasorigallagaat, Siumumeersoq Lars-Emil Johansen, Sermitsiaq.AG-mut.
Atuaruk: Hans Enoksenip misissuisimaneq saqqummiutequaa
Misissuisimanerup inernera bankboksimi toqqoqqavoq
Kisianni Lars-Emil Johansenip ilanngullugu oqaluttuaraa nammineq Inatsisartunut siulittaasuungallartutut pisinnaatitaaffeqarnani misissuisimanerup inerneranut saqqummiussinissaminut.
- Kukkunersiuinermut ataatsimiisitaliap kisimi Naalakkersuisuni ilaasortat ilaasortaasimasullu nunatta karsianik atuisarsimanersut pillugit misissuisimanerup inernera kisimik ammarsinnaavaat atuarsinnaallugulu, Lars-Emil Johansen oqarpoq, nangillunilu:
- Ilisimatinneqarpunga misissuisimanerup inernera allakkani matoqqasuniittoq Grønlandsbankimi bankboksimut ilineqarsimasoq. Taanna atorfilittanit politikkerinilluunniit atuarneqarnikuunngilaq. Tassami kukkunersiuinermut ataatsimiisitaliap kisimi taanna isumaliuteqarfigisinnaavaa suliaraluguluunniit.
Taamaammat Lars-Emil Johansen ilanngullugu nassuiaavoq Deloittep misissuisimanerata inernera, taamaallaat Inatsisartunut novembarip 28-ani qinersisoqareerpat, kukkunersiuinermillu ataatsimiisitaliamik pilersitsisoqareerpat, aatsaat avammut saqqummiunneqassaguni saqqummiunneqarsinnaasoq.