misissuineq
Hans Enoksenip misissuisimaneq saqqummiutequaa
Partii Naleqqap siulittaasuata, Hans Enoksenip, aamma Naalakkersuisuni ilaasortaasimasup, naalakkersuisuini ilaasortat ilaasortaasarsimasullu nunatta karsianik atuisarsimanerannik misissuisitsinerup avammut saqqummiunneqarnissaa kissaatigaa
Siumup aamma Atassutip Naalakkersuisooqatigiinnerat ajalusoortinneqarpoq, kukkunersiuinermut ataatsimiisitaliap siulitaasorisimasaata, Kristian Jeremiassenip, Aleqa Hammondip nunatta karsianik atornerluisarsimanera tallimanngornermi septembarip 26-ani saqqummiummagu. Taamani aamma Kristian Jeremiassenip ilisimatitsissutigaa kukkunersiuisut, Deloitte, naalakkersuisuini ilaasortat ilaasortaasarsimasullu nunatta karsianik atuisarsimanersut aamma misissuiffigalugit aallartikkai.
Misissuinerlu taanna, Hans Enoksen malillugu, maanna naammassisimalerpoq.
Taamaammat Hans Enoksenip maanna Inatsisartuni siulittaasuungallartoq, Lars-Emil Johansen, qinnuigaa Deloittep naalakkersuisuini ilaasortat ilaasortaasarsimasullu pillugit misissuisimanera avammut saqqummiutequllugu.
- Naalakkersuisut kingulliit, siusinnerusukkullu naalakkersuisuusimasut aningaasanik atuinerat pillugu misissuiffigineqarnerat naammassineqarsimasoq ilisimatinneqarpugut. Uangalu pineqartunut ilaasunga kissaatigaara tamanut ammasumik saqqummiunneqassasut, inuimmi uagutsinnik nalilersuinerat nuannerpallaanngimmat, ilaatigut pasineqarluta atornerluillutalu peqquserlussimasugut, Hans Enoksen oqarpoq, nangillunilu:
- Suliaq naammassineqarsimappat piaartumik tamanut ammasumik misissuinerit saqqummiunneqarnissaat kissaatigaara.
Hans Enoksenip ilanngullugu tikkuarpaa inuiaqatigiit kissaatigigaat siunissami torersumik ingerlanissap qulakkeerneqarnissaa. Aammalu siunissami unioqqutitsilluni ingerlatsinissaq Inatsisartuni Naalakkersuisunilu peqqissanngitsoq.
- Taamaattumik Inatsisartunut siulittaasugallartoq qinnuigaara suliat misissuinerillu naammassereersimasut saqqummiunneqarnissaat sulissutigissagaa, Hans Enoksen oqarpoq.