misissuineq
Ataatsimiisitaliaq: Bankboksi ammarneqarpoq
Kukkunersiuinermi ataatsimiisitaliap bankboksi oqallisaaqisoq, aammalu Naalakkersuisuni ilaasortaasarsimasut nunatta karsianik atuisarsimanersut pillugit misissuisimanermik imalik, ammarpaat. Naalakkersuisut akissuteqaqquneqarput kingusinnerpaamik januaarip arferngani
Kukkunersiuisut Deloittekkunneersut Naalakkersuisuni ilaasortaasarsimasut, kiisalu misissuinermik nalaanni ilaasortaasut, pillugit missuinerat novembarimi sapaatip akunnerani siullermi piareeraluarluni aatsaat Inatsisartunut novembarip 28-ani qinersisoqareerneratigut saqqummiunneqarsinnaavoq.
- Ilisimatinneqarpunga misissuisimanerup inernera allakkani matoqqasuniittoq Grønlandsbankenimi bankboksimut ilineqarsimasoq. Taanna atorfilittanit politikkerinilluunniit atuarneqarnikuunngilaq, taamanikkut Inatsisartuni siulittaasuungallartoq, Siumumeersoq Lars-Emil Johansen, Sermitsiaq.AG-mut oqarpoq.
Kisianni tassa maanna Inatsisartut kukkunersiuinermut ataatsimiisitaliaata inissititereerluni bankboksi oqallisaaqisoq ammarsimavaa.
Atuaruk: Misissuisimaneq qinersisoqareerpat aatsaat saqqummiunneqarsinnaavoq
Atuaruk: Kikkut nunatta karsiani anigaasanik atorsimanersut takukkit
Naalakkersuisut januarip arferngani akeqquneqarput
Kukkunersiuinermut ataatsimiisitaliap siulittaasua, Demokraatineersoq Randi Vestergaard Evaldsen, allappoq misissuineq amerlasuunik akissutissarsiffiuvoq, aammali arlalinnik apeqqutissarsiffiulluni kiisalu kaammattuutinik arlalinnik saqqummiussiviulluni.
- Taamaattumillu apeqqutinut saqqummersunut isummernissaat siunertaralugu misissuinerup inernerata Naalakkersuisunut ingerlateqqinneqarnissaa kukkunersiuinermut ataatsimiititaliamit aalajangiunneqarpoq.
- Naalakkersuisut qanoq iliuuseqareersimanersut aammalu siunissami taama pisoqaqqeqqunagu qanoq iliuuseqalersaarnersut ilanngullugu paasissutissiissutigeqquneqarpoq, Kukkunersiuinermut ataatsimiititaliap siulittaasua taama ilisimatitsivoq.
Atuaruk: Hans Enoksenip misissuisimaneq saqqummiutequaa
Naalakkersuisut kingusinnerpaamik januaarip arferngani ullup qeqqartinnagu misissuinerup inerneranut oqaaseqqaqquneqarput.
Naalakkersuisut oqaaseqataat tiguneqareerpata, Kukkunersiuinermut ataatsimiisitaliamit isummerfigineqassapput.
Misissuinermi misissuiffigineqarput Naalakkersuisuni 2009-miit 2014-imut ilaasortaasimasut.