ujakkaarneq
Ujakkaartartut arpallutik pitsanngoriartortut
Martin Mølleri Det Internationale Skiforbundip allattorsimaffiani suli qaffakkiartorpoq. Sapaatip-akunnerata matuma siorna sapaammi taanna Karl-Peter Kristensen aamma Frederik Petersen peqatigalugit 10 kilometerimut arpapput
Kalaaleq ujakkaartartoq Martin Møller, sæsonip aallartinnerani napparsimareerluni, maanna siumut aallaqqippoq.
Tassami Østrigimi illoqarfiimmi Seefeldimi arpattunit 157-usunit 28-ulluni apuuppoq, 78 FIS-pointinnalluni.
Karl-Peter Kristensen Frederik Petersenilu aamma arpalluaqaat. Karl-Peter Kristensen minutsimik ataatsimik sekundinillu 24-inik Martinimit kingulliulluni apuuppoq, taannalu angusaqarluarluni 127 FIS-pointinnappoq, Frederik Petersenilu aatsaat nunani tamalaani unamminermi peqataasoq 1 minut 23 sekundinik Karl-Peter Kristensenimit kingulliuvoq.
Atuaruk: Karl-Peter Kristen Continental Cupimi tupaallatsitsisoq
Misilittagaqalertitsisoq
- 10 kilometerimut sukuutserlunga arpannera ajunngeqaaq, uangalu Europamut unammiartoqqaarninni 176 FIS-pointinnannera naammagisimaaqaara. FIS-Racet pillugit ilikkagaqaqaanga. Taamaattumik arpannerit tamaasa angusat pitsaaligaluttuinnassapput. Suleqatigiinnissarput qilanaaraara aammalu siunissami, arpannissap tullianut utaqqisinnaarpianngilanga, Frederik Petersen oqarpoq. Taanna taamatut ingerlaannaruni Nunatsinnit 2017-mi Finlandimi VM-mut peqataasinnaasut pingajorissavaat.
Uani weekendimi Martin Mølleri sæsonimi World Cupimut siullermut arpaqataaqqammerpoq. Tassani Schweizimi 30 kilometerimut arpappoq.
Atuaruk: Martin Møller pitsaanerpaat ilaanniikkusuppoq
Siuariarneq
- Arpalluarnerpaaffima ilai maani Davosimi arpannikuuakka, taamaattumik arpalluarnissamut neriuuteqarsimavunga. Maannalu aamma ingerlalluarpunga, ukioq manna arpaffik sakkortuvoq, aallartittunilu allattorsimaffimmi inissisimanerlunnerpaallunga aallartippunga, Martin Møller oqarpoq.
- Taamaammat arpalluni qaangeraalaarluni angusarinerulerluni iluarpoq. Katinnerani 83-usunit 77-inngorpunga. Upernaaq pitsaassuserisimasara suli atinngilara. Sapaatip-akunnerinili kingullerni malunnaatilimmik siuariartorpunga, mannalu sæsonimi arpalluarfiginerpaagunarpara, Martin Møller oqarpoq.
Weekendip tulliani aamma World Cupeqaqqissaaq, tassanilu Martin Møller aamma peqataassaaq.
Atuaruk: Karl-Peter ujakkaarluni aallartilluartoq