ujakkaarneq
Karl-Peter ujakkaarluni aallartilluartoq
Karl-Peter Kristensenimut ukioq ujakkaarfiusoq aallartilluaraluartoq, Martin Møllerip naapparsimanini pissutigalugu pilersaarutini allanngortittariaqarpai
Kalaaleq ujakkaartartoq Aasianneersoq Karl-Peter Kristensen, Finlandimi weekendemi ukioq ujakkaarfiusoq aallartippaa.
Sukuutserluni 12,5 kilometerimut arpannermi siorna angusarissaarneruvoq, ajugaasumit Alexey Chervotkinimit Ruslandimeersumit 3,44 sekundinik kigaannerulluni apuuppoq.
Angusaq naammagisimaaraa
Taamaammallu 123 FIS-pointinnappoq, siorna 134 FIS-pointinnassimalluni. FIS-pointit ikinnerpaatinniarsarineqartarput.
- Ukioq ujakkaarfiusoq aatsaat aallartikkaluartoq, aatsaallu sisoraatinik apummi sungiusarneq aallartikkaluartoq unamminermi siullermi angusara naammagisimaarpara, Karl-Peter Kristensen nalunaarummini allappoq.
Pilersaarutit allanngortikkai
Kalaalleq alla ujakkaartartoq, Martin Møller, ukiup ujakkaarfiusup aallartilernerani napparsimalluni iluatsitsivallaanngilaq.
Tamatuma kinguneranik piffissami sivisuumi sungiusarsimanngilaq, ajornakusoortumillu aallartippoq aammalu sungiusarluarsimanissamik neriuuteqarnini unioqqavaa.
- World Cupinut aamma Tour de Skinut amerlasuunut peqataanissara pilersaarutigigaluarakku. Maanna nutaamik pilersaarusiortariaqalerpunga aammalu sivisuumik tamakkiisumik sungiusartariaqalerpunga unamminernut angisuunut peqataanissannut naatsorsuuteqarniaruma, Martin Møller allappoq.
Atuaruk: Martin Møller pitsaanerpaat ilaanniikkusuppoq
Sungiusaqatigiissasut
Taamaattorli Martin Møllerip ukioq ujakkaarfiusoq pitsaasuunissaa aalajangiuteqqavaa.
- Ujakkaarfiusoq sivikinnerulaassaaq, ukioqqaarnerani sungiusarluarsimaneq anguniaqqittariaqarnera pissutaalluni. Ajoraluarpoq, kisianni allanngortinneqarpiarsinnaanngilaq, Martin Møller oqarpoq.
Karl-Peter Kristensen decemberimi Østrigimi unammeqataasussap, Schweizimi Davosimi Martin Møller aamma Frederik Petersen sungiusaqatigissavai.