Siumut aamma IA Løkkemit naalakkersuisooqatigiiliornissaq pillugu ataatsimiigiaqquneqaqqittoq

Allaaserisaq nalunaaqutaq 16:32 nutaamik ilaartorneqarpoq Inuit Ataqatigiit ilanngullugit

Folketingimut qinigaaqqammersut marluk qallunaat inatsisartuini sulinini maanna aallartillualeruttorpaat.

Aleqa Hammondip Socialdemokraatinut siulittaasunngortussaq Mette Frederiksen, pingasunngornermi ataatsimeeqatigaa. Ataatsimiinnermi Siumup aamma Socialdemokraatit qanimut suleqatigiinnerat qinigaaffiup siulianitut nutarsaqqitamik suleqatigiinnissamut kissaateqarlutik oqariartuuteqarput.

Folketingimi Siumut taama paasissutissiipput.

Siumup politikkikkut Socialdemokraatinik maanna Folketingimi qinigaaffiusumi suleqatiginninnerup tungaatigut kissaataat ilanngullugu Aleqa Hammondip saqqummiuppai.

- Mette Frederiksenip siunnersuutit maanna nalilersussavai uterfigeqqissallutalu, taamatullu partiini siulittaasut taakku, Siumumit Kim Kielsen aamma Mette Frederiksen siunnersuutit ataatsimiissutigissavaat periarfissaq siulleq atorlugu, Aleqa Hammond ilisimatitsivoq.

Atuaruk. Kim Kielsen pissaaneq pilllugu: Partiit anginersaat suli peqatigaarput

Lars Løkke ataatsimeeqatigeqqillugu
Mette Frederiksen Kalaallit Nunaannut tikeraarnissaanik neriuuteqarluni Hammond naggasiivoq, tamannalu ‘tigulluarneqartutut politikerip siumumeersup oqaatigaa.

Marlunngornermi nalunaaqutaq 9.00 Siumut aamma Inuit Ataqatigiit oqalliseqatigeeqqinnissamut kunngikkormiut misissuisussatut toqqagaannut aamma Venstremi siulittaasumit Lars Løkke Rasmussenimit naalakkersuisunik amerlanerussuteqartunik pilersitsinissaq pillugu aggersarneqarpoq.

Lars Løkke Rasmussen sapaatiummat nunani avannarlerneersut Folketingimi ilaasortat oqaloqatigai.

Inuit Ataqatigiit folketingemut ilaasortanngorlaavat, Aaja Chemnitz Larsen, Kalaallit Nunaanni pineqaatissinneqarsimasut inissiisarfianiittunut pitsaanerunissaat piumasaraa, IA-p soorlu aamma aningaasanut inatsimmik isumaqatigiinniarnerni aalajangersimasumik peqataajuaannarnissaq piumasaraat. Kiisalu partiip USA-mut illersornissamut isumaqatigiissut 1951-meersoq nutarternissaa, aammalu Folketingemi ataatsimiititaliani pingaarutilinni issianissaq piumasaraat.

Aleqa Hammond qinersinerup kingorna qallunaat naalakkersuisussaannut piumasaqaatitik pillugut oqassaavallaanngilaq. Sapaatip akunnera kingulleq sisamanngormat Folketingimut qinersinerup kingorna Sermitsiaq.AG-p apersornissaanut iluatsissimanngilaa.

Atuaruk. IAp aamma Siumup Løkkemut piumasaqaatitik saqqummiuppaat